როგორ გადაიქცა ირაკლი ღარიბაშვილი ორბანის მთავარ მოკავშირედ? ბიბისი-ს მიერ საქართველოს შესახებ გამოქვეყნებული სტატია განგაშის საფუძველი ხდება.
მაღალი სანდოობით ცნობილ მედიაში ტერმინ ორბანიზაციის გამოყენების შემდეგ, ოპოზიციაში ამბობენ, რომ საქართველოს მთავრობა ხავსს ეჭიდება და მოკავშირეების გარეშე დარჩენილი ღარიბაშვილი ორბანის დახმარებით ცდილობს დაამტკიცოს, რომ დასავლეთში სასურველ პოლიტიკოსად აღიქმება. არადა ორბანი ის პოლიტიკოსია, რომელიც პრორუსული რიტორიკით გამოირჩევა. 
"ლელოს" ერთ-ერთი ლიდერის, სალომე სამადაშვილის თქმით, როდესაც ორბანის მსგავსი მოკავშირე გყავს ევროკავშირში, ეს მხოლოდ დამაზიანებელია ქვეყნისთვის.

"ღარიბაშვილის მოკავშირე, დამკვეთიც და უფროსიც არის ვლადიმერ პუტინი და რუსეთი, ამიტომ ბუნებრივია, რომ ერთადერთი ხელისუფლება ევროკავშირის წევრ ქვეყნებს შორის, რომელიც დღეს შეიძლება მოვიაზროთ ღარიბაშვილის და ბიძინა ივანიშვილის ხელისუფლების მოკავშირედ, არის იგივე ხელისუფლება, რომელიც იცავს რუსეთის ინტერესებს ევროკავშირში. დღეს ეს არის უნგრეთის დღევანდელი ხელისუფლება. ორბანის მსგავსი მოკავშირე როდესაც გყავს ევროკავშირში, ეს არის მხოლოდ დამაზიანებელი შენთვის, როდესაც ქართლი ოცნება გააგდეს მაგალითად სოციალისტური პარტიიდან. პროპაგანდა, რასაც ეწევა ქართული ოცნება მისი ქვედანაყოფი "ხალხის ძალა", "ალტ ინფო" და სხვა დაჯგუფებები, არ არის არანაირი კონსერვატორული დღის წესრიგი. კონსერვატორი იყო რონალდ რეიგანი, კონსერვატორი იყო მარგარეტ ტეტჩერი, ეს ხალხი არიან ჩვეულებრივი ძალადობის და ზიზღის პროპაგანდის გამავრცელებელი პოლიტიკოსები" - ამბობს სალომე სამადაშვილი.

საქართველოს "ორბანიზაცია". როგორ აირჩია ქვეყანამ უნგრეთის კონსერვატიული პოპულიზმი ევროკავშირისკენ მიმავალ გზაზე - ამ სათაურით სტატიას BBC-ის რუსული ბიურო აქვეყნებს. სტატიის ავტორი წერს, რომ საქართველოს ხელისუფლებისთვის, დასავლეთთან და უკრაინასთან ურთიერთობის გაციების ფონზე, უნგრეთი, როგორც ჩანს, მთავარი თანამოაზრეა ევროკავშირში.
გამოცემა წერს, რომ უნგრეთის პრემიერმინისტრი ვიქტორ ორბანი, რომელსაც ევროპაში თავისუფლების შეზღუდვისა და პუტინთან მეგობრული ურთიერთობების გამო აკრიტიკებენ, საქართველოს ამჟამინდელი ხელმძღვანელობისთვის მოსახერხებელი პარტნიორია.