რუსეთი 11 ქვეყანასთან უვიზო მიმოსვლის შესახებ სამთავრობათაშორისო შეთანხმებას ამზადებს. შეთანხმებაში შემავალ ქვეყნებს შორის იქნება: საუდის არაბეთი, ქუვეითი, ბაჰამას კუნძულები, მალაიზია და მექსიკა. ამის შესახებ რუსულ პროპაგანდისტულ მედია TASS-ს რუსეთის საგარეო საქმეთა მინისტრის მოადგილემ, ევგენი ივანოვმა განუცხადა.

"ჩვენ ვამზადებთ სამთავრობათაშორისო შეთანხმებების პროექტს [რუსეთის] მოქალაქეებისთვის უვიზო მიმოსვლის შესახებ რამდენიმე ქვეყანასთან. მათ შორისაა, ბაჰრეინი, ომანი, საუდის არაბეთი, ბაჰამის კუნძულები, ბარბადოსი, ჰაიტი, ზამბია, ქუვეითი, მალაიზია, მექსიკა, ტრინიდადი და ტობაგო. შეთანხმებები განვითარების სხვადასხვა ეტაპზეა. თუმცა, მნიშვნელოვანია გვესმოდეს, რომ ასეთი საერთაშორისო ხელშეკრულებების მოლაპარაკების პროცესი ორმხრივია და მათი ხელმოწერის ეტაპი ერთნაირად დამოკიდებულია ჩვენზე და ჩვენს პარტნიორებზე", - თქვა ივანოვმა.

ივანოვმა აღნიშნა, რომ რუსეთის საგარეო საქმეთა სამინისტრო შეთანხმების მიღწევის შესახებ "საზოგადოებას აუცილებლად აცნობებს".
მანამდე, რუსეთის საგარეო საქმეთა მინისტრმა სერგეი ლავროვმა თქვა, რომ რუსეთი 11 ქვეყანასთან უვიზო რეჟიმის შემოღებას გეგმავს.