დაკავებულები რუსეთის წინააღმდეგობისთვის - "ერთიანი ნაციონალური მოძრაობის" თავჯდომარემ ლევან ხაბეიშვილმა დიღომში, წინასწარი დაკავების იზოლატორთან განცხადება გააკეთა და თქვა, რომ მისი ინფორმაციით, ერთი სტუდენტი არის ნაცემი. 
ლევან ხაბეიშვილმა თითოეული დაკავებულის ოჯახის წევრს იურიდიული დახმარება შესთავაზა. მისი თქმით, იურისტი ვანო პეტრიაშვილი ყველა დაკავებულის მონახულებას ეცდება. გარდა ამისა, მისი ინფორმაციით, პროცესში ჩართული არიან არასამთავრობოებიც. 

"პუტინისტებმა გუშინ რუსული კანონის განხილვის პარალელურად დააკავეს ანტიპუტინისტური კანონის წინააღმდეგ მებრძოლი აქტივისტები, მშვიდობიანი მანიფესტანტები. აქ იყვნენ სტუდენტები - თბილსის სახელმწიფო უნივერსიტეტის სტუდენტები, ილიას სახელელმწიფო უნივერსიტეტის სტუდენტები, იყვნენ ენმ-ის წევრები, არასამთავრობო ორგანიზაციების წევრები, დააკავეს ჟურნალისტები, სამოქალაქო აქტივისტები. გუშინ რუსი ივანიშვილი მოიქცა ისე, როგორც პუტინი იქცევა ხოლმე მოსკოვის ცენტრში გამართული აქციების პარალელურად. რუსულად. 36 ადამიანი ჰყავთ იზოლატორში გამოკეტილი. მათ შორის პატარა პუტინისტები რომ არა სირაძეები, ბზისშვილები, რომლებიც გამოირჩევიან აგრესიით და მაღალი თანმდებობის პირები არიან საპატრულო პოლიციაში...
ჩვენ ვიცით, რომ ერთი სტუდენტი არის ნაცემი, ჩაუტარდა როგორც ვიცი ექსპერტიზაც, ძალიან მნიშვნელოვანია. ექიმიც არის ჩვენთან ლევან მეტრეველი და თუ მისცემენ შესაძლებლობას, მონახულებისას, მზად ვართ, მოინახულოს. ყველამ უნდა იცოდეს, არაფრის არ შეგეშინდეთ, ამ პუტინისტებს დავდებთ ბეჭებზე. არავინ იფიქროს, რომ ვინმე სადმე ბრძოლაში მარტოა, მთელი საქართველო არის ჩვენთან ერთად“ - თქვა ლევან ხაბეიშვილმა. 

შეგახსენებთ, რომ გუშინ რუსული კანონის საწინააღმდეგო აქციაზე პოლიციამ სამქოლაქო პროტესტისთვის 36 პირი დააკავა. მათგან ორი, ინტერნეტგამოცემა "პუბლიკას'" რედაქტორი ზურა ვარდიაშვილი და "ტაბულას'" ჟურნალისტი ბექა ჯიქურაშვილი წუხელვე გაათავისუფლეს, დანარჩენები კი ამ დრომდე წინასწარი დაკავების იზოლატორში რჩებიან. მათ შორის არიან ოპოზიციური პარტიების წევრები, ასევე სამოქალაქო აქტივისტები.  27 დაკავებული დიღმის სამმართველოში იმყოფება, დანარჩენები კი ზაჰესის დროებითი მოთავსების იზოლატორში.