"ოცნების" დეპუტატის, გია ვოლსკის თქმით, საზოგადოების შეცდომაში შეყვანას ცდილობს, ის ვინც აცხადებს, რომ საშვებზე შეზღუდვის მიზანი მიხეილ სააკაშვილის იზოლაციაა. მისი თქმით, რევოლუციური კომიტეტი შექმნეს საავადმყოფოში, იმ ლუქსში, რომელშიც სააკაშვილი დროებით ცხოვრობს.  

"წარმოუდგენელია, რაც ახლა სააკაშვილის გარშემო ხდება - რევოლუციური კომიტეტი შექმნეს საავადმყოფოში, იმ ლუქსში, სადაც სააკაშვილი დროებით ცხოვრობს. არათუ მისი ჯანმრთელობა და ფსიქოლოგიური მდგომარეობა არ ედარდებათ, მისი სიცოცხლეც კი. თავის პროპაგანდისტურ აქტივობებში მოწამვლა, დამძიმება, პუტინის გვარი შემოიტანეს და დაიქირავეს უშველებელი პროპაგანდუსტული ორგანიზაცია, სადაც ფულს ხარჯავენ, მსოფლიოს ეუბნებიან, რომ მოწამლული სააკაშვილი უნდა მოკვდეს და ასე შემდეგ.
აქ არ არის მხოლოდ რეჟიმის დაცვის აუცილებლობა, არამედ აქცენტი გასაკეთებელია მისი ჯანმრთელობისა და უსაფრთხოების დაცვაზე. მეტიც, ხაზგასასმელი სწორედ ეს ნაწილია, სააკაშვილის ჯანმრთელობისა და სიცოცხლის უსაფრთხოება ყველა მხრივ უნდა იყოს დაცული, მით უმეტეს მოწამვლის თემის გარშემო სრული თაღლითების შეკრება აუცილებლად მოითხოვს უსაფრთხოების დამატებითი ზომების მიღებას"  - ამბობს ვოლსკი.

შეგახსენებთ, რომ შალვა პაპუაშვილის გადაწყვეტილებით 3 იანვრიდან პარლამენტის წევრებისთვის საქართველოს მესამე პრეზიდენტის მონახულების მიზნით პენიტენციურ დაწესებულებაში ნებართვის გარეშე შესვლის უფლების მინიჭება ჩერდება.