შეერთებული შტატების მაღალი რანგის ოფიციალური პირები მიმდინარე კვირაში რუს კოლეგებთან პატიმრების გაცვლის საკითხზე შეხვედრას გეგმავენ. მოლაპარაკება რუსეთში დაკავებული ყოფილი ამერიკელი საზღვაო ქვეითს, პოლ უილანის გათავისუფლებას შეეხება.
Reuters წყაროზე დაყრდნობით წერს, რომ თავის მხრივ, რუსეთს საქართველოს მოქალაქის ზელიმხან ხანგოშვილის მკვლელის ვადიმ კრასიკოვის გათავისუფლება სურს.
8 დეკემბერს აშშ-მა რუსეთს ამერიკელი კალათბურთელი ბრიტნი გრაინერის გათავისუფლების სანაცვლოდ, რუსი იარაღით მოვაჭრე, ვიქტორ ბუტი გადასცა. ბუტის გაცვლის შემდეგ, პუტინმა თქვა, რომ აშშ-სა და რუსეთს შორის პატიმრების კვლავ გაცვლა შესაძლებელია.
ხანგოშვილის მკვლელი კრასიკოვი სასჯელს გერმანიის ციხეში იხდის. ამერიკული მედია ჯერ კიდევ ივლისში ავრცელებდა ინფორმაციას, რომ რუსეთი ამერიკელი პატიმრების სანაცვლოდ ვიქტორ ბუტის გარდა კრასიკოვსაც ითხოვდა. CNN-ის თქმით,  მოსკოვმა ვაშინგტონს კრასიკოვის გაცვლის სურვილი არაფორმალური გზებით შეატყობინა.
გარდა ამისა, მედია წერდა, რომ საკითხთან დაკავშირებით, აშშ-ს წარმომადგენლებმა გერმანიის მთავრობას მიმართეს - სურდა თუ არა გერმანიას, ვადიმ კრასიკოვი აშშ-სა და რუსეთს შორის გაცვლის ნაწილი გამხდარიყო. გერმანული წყაროს განცხადებით, ეს მოთხოვნა გერმანიის მთავრობის უმაღლეს დონეზე არ განხილულა.