თუ „ქართული ოცნება“ მხარს დაუჭერდა რეზოლუციას, ისინი აუცილებლად იტყოდნენ, რომ „ქართულ ოცნებას“ მოუწია მიხეილ სააკაშვილის პოლიტპატიმრად აღიარება, - ამის შესახებ ფრაქცია „ქართული ოცნების“ თავმჯდომარე, მამუკა მდინარაძემ ევროპის საბჭოს საპარლამენტო ასამბლეის რეზოლუციაზე საუბრისას განაცხადა.
მამუკა მდინარაძის განცხადებით, როდესაც ქვეყანას რუსეთის საწინააღმდეგო რეზოლუციის მიღებისა და პოლიტპატიმრების არსებობის ალტერნატივებს შორის აყენებ, ამორალურია.
„მათ სცადეს ორი კურდღლის დაჭერა. ერთი მიმართულება იყო, რომ თუ „ქართული ოცნება“ მხარს დაუჭერდა ამ რეზოლუციას, ისინი აუცილებლად იტყოდნენ, რომ „ქართულ ოცნებას“ მოუწია მიხეილ სააკაშვილის პოლიტპატიმრად აღიარება, პოლიტპატიმრების სისტემის შემქმნელ ადამიანზეა საუბარი. თუ არ დავუჭერდით მხარს, იტყოდნენ იმას, რასაც დღეს საუბრობდნენ, რომ „ქართულმა ოცნებამ“ არ დაუჭირა მხარი რუსეთის საწინააღმდეგო რეზოლუციას, მაშინ როდესაც 400-მდე რეზოლუციას და დოკუმენტს დავუჭირეთ მხარი წინა პერიოდში და მათ შორის ისეთ დოკუმენტებსა და რეზოლუციებსაც კი, სადაც საუბარია ჰააგის სასამართლოსთვის მიმართვაზე რუსეთის წინააღმდეგ.
ამორალურია ის, რომ რეზოლუციაში შეაპარონ მიხეილ სააკაშვილის საკითხი. სახალხო პარტიის წარმომადგენლებს პარტია ჰყავთ შემადგენლობაში, რომლის რეალური ლიდერი არის რეციდივისტი, სისხლის სამართლის დამნაშავე და უსასტიკესი რეჟიმის შემქმნელი, მიხეილ სააკაშვილი. სწორედ იმიტომ შეაპარეს, რომ ან უნდა ეიძულებინათ „ქართული ოცნება“, ქართული სახელმწიფო, რომ პოლიტპატიმრები ეღიარებინა თავის ქვეყანაში, ან მხარი არ დაეჭირა რეზოლუციისთვის. ამ ალტერნატივის წინაშე რომ აყენებ საკუთარ სახელმწიფოს, ეს არის ამორალური“, - განაცხადა მამუკა მდინარაძემ.