საქართველო უცხოური ინვესტიციებისთვის მიმზიდველი ქვეყანაა - ღარიბაშვილი
დღეს მართლაც დიდებულია დღეა. ვულოცავ კომპანია "პეისს", მის თითოეულ თანამშრომელს, ასეთი მასშტაბური პროექტის წარმატებით განხორციელებას. მოგეხსენებათ, 2020 წლიდან კომპანიის მხრიდან მიმდინარეობდა ფოთის ახალი ნავსადგურის მშენებლობა, რაც უაღრესად მნიშვნელოვანი პროექტია რეგიონისთვის. დღეის მდგომარეობით განხორციელებული ჯამური ინვესტიცია შეადგენს 93 მილიონ ამერიკულ დოლარს, რომელიც ორივე ფაზის დასრულების შემდეგ 120 მილიონ დოლარამდე გაიზრდება. განსაკუთრებით მინდა აღვნიშნო მთავარი სტრატეგიული პარტნიორის, აშშ-ის ჩართულობა ამ პროექტში. ამერიკის ფედერალური მთავრობის საერთაშორისო ფინანსური განვითარების კორპორაციიდან გამოყოფილი იქნა დაფინანსება 50 მილიონი დოლარის ოდენობით. ეს კიდევ ერთი გამოხატულებაა, რომ საქართველო უცხოური ინვესტიციებისთვის მიმზიდველი ქვეყანაა და წარმოადგენს რეგიონში უდიდესი სატრანზიტო და სატრანსპორტო პოტენციალის მქონე ქვეყანას.თქვა პრემიერმა ირაკლი ღარიბაშვილმა ფოთში, ახალი ნავსადგურის გახსნის ღონისძიებაზე.