ევროკავშირის საბჭომ რუსეთის წინააღმდეგ საინფორმაციო მანიპულაციებისთვის სანქციები გააფართოვა.
შეზღუდვები დაუწესდა 7  ფიზიკურ პირსა და 5 კომპანიას, რომლებიც პასუხისმგებელი არიან ციფრული მანიპულაციის საინფორმაციო კამპანიაზე, რომლის მიზანიც იყო ინფორმაციის დამახინჯება და უკრაინის წინააღმდეგ რუსეთის მხარდამჭერი პროპაგანდის გავრცელება.
ეს კამპანია, რომელშიც მონაწილეობდნენ რუსეთის სახელმწიფო უწყებები და უწყებებთან აფილირებული პირები, ეყრდნობოდა ყალბ ვებგვერდებს, რომლებიც იპარავდნენ ეროვნული მედიისა და სამთავრობო ვებსაიტების იდენტობას, ასევე ყალბ ანგარიშებს სოციალურ ქსელებში.
საბჭომ "შავ სიაში" შეიყვანა რუსეთის სამხედრო დაზვერვასთან, გრუ-სთან დაკავშირებული ონლაინ გამოცემა "ინფოროსი" და მისი სამი დამფუძნებელი, რომელიც პასუხისმგებელია 270-ზე მეტი მარიონეტული ონლაინ მედია საშუალების შექმნაზე.
"შავ სიაში" ასევე შევიდა პრეზიდენტის ადმინისტრაციასთან დაკავშირებული რუსული არაკომერციული ორგანიზაცია ANO Dialog, რუსული დიასპორის ინსტიტუტი, ასევე ორი რუსული IT-კომპანია, რომელიც ჩართულია რუსეთის ციფრულ დეზინფორმაციულ კამპანიაში.
გარდა ამისა, სანქციები დაუწესდა აღნიშნული ორგანიზაციების წარმომადგენლებს. უკრაინის ტერიტორიული მთლიანობის, სუვერენიტეტისა და დამოუკიდებლობის ხელყოფისთვის ევროკავშირის მიერ დაწესებული სანქციები ამჟამად დაახლოებით 1 800 პირისა და კომპანიის წინააღმდეგ მოქმედებს.