ამერიკაში იმყოფებოდა ორი ქართველი მოსამართლე, რომლებმაც წარსულში "მთავარი არხის" დამფუძნებლის, ნიკა გვარამიას საქმის მოსამართლეს ლაშა ჩხიკვაძეს სოლიდარობა გამოუცხადეს და შტატებში წასვლაზე მაშინ უარი თქვეს. 
ხათუნა ხარჩილავა და ნინო ნაჭყებია ქალაქ ბალტიმორში,  87-ე ყოველწლიურ კონფერენციაზე იმყოფებოდნენ, რომელიც ოჯახში ძალადობისა და არასრულწლოვანთა მართლმსაჯულების თემებს ეხებოდა.

"მოსამართლეებმა ამერიკელი კოლეგებისგან საუკეთესო გამოცდილება გაიზიარეს სხვადასხვა მიმართულებით, მათ შორის, აღდგენითი მართლმსაჯულების მექანიზმებისა და დამცავი ორდერების შესახებ. ვაშინგტონში კი ოჯახში ძალადობის საქმეებზე სასამართლო პროცესებს დაესწრნენ.
ვიზიტი ქართველი მოსამართლეებისთვის გამართული აშშ-ის უზენაესი სასამართლოს ტურითა და სასამართლოს როლის შესახებ ბრიფინგით დასრულდა", - ნათქვამია საელჩოს განცხადებაში.

გასულ წელს მათ შტატებში გამგზავრებაზე უარი მას შემდეგ განაცხადეს, რაც იმავე პროგრამიდან ლაშა ჩხიკვაძე მოიხსნა. ჩხიკვაძისადმი მოსამართლეების სოლიდარობის გამოცხადებას წინ უსწრებდა "ქართული ოცნების" თავმჯდომარის, ირაკლი კობახიძის მოწოდება, რომ სხვა მოსამართლეებიც ანალოგიურად მოქცეულიყვნენ.