უკრაინის ეროვნული უსაფრთხოებისა და თავდაცვის საბჭოს მდივანი, ალექსეი დანილოვი ამბობს, რომ სულ მცირე 14 რუსი გენერალი იცის, რომლებიც მხარს უჭერდნენ  "ვაგნერის" ხელმძღვანელს, ევგენი პრიგოჟინს. ამ თემაზე მან Reuters-სთან ისაუბრა. 

"ბევრი მეთაურია, რომლებიც თანაუგრძნობენ ვაგნერს და არ სურთ გაყვნენ პუტინს", - თქვა დანილოვმა.

Reuters ესაუბრა გარნიზონის ქალაქ ბოგუჩარის სამ მცხოვრებს, ამ ქალაქში გაიარა "ვაგნერმა" აჯანყების დროს.
სამმა ადგილობრივმა მცხოვრებმა თქვა, რომ იქ სამხედროებს წინააღმდეგობის გაწევისთვის არაფერი გაუკეთებიათ და რომ ქალაქში მცხოვრები ხალხის მნიშვნელოვანი ნაწილი, მათ შორის სამხედრო სამსახურში მყოფი მოქალაქეები "ვაგნერს" თანაუგრძნობდნენ.
იქ მაცხოვრებელმა ქალმა ასევე თქვა, რომ "ვაგნერს" ფართო მხარდაჭერა ჰქონდა ქალაქში და რომ ბევრი "ვაგნერის" მებრძოლი ბოგუჩარიდანაა. "ისინი ყველანი მეგობრები არიან", - თქვა მან.
შეგახსენებთ, რომ რუსეთში 23 ივნისს სამხედრო არეულობა დაიწყო. კერძო სამხედრო კომპანია "ვაგნერის" ხელმძღვანელმა, ევგენი პრიგოჟინმა თქვა, რომ რუსეთის თავდაცვის სამინისტრომ მათ ბანაკზე სარაკეტო იერიში მიიტანა. მან თქვა, რომ დაქირავებული მებრძოლების დიდი რაოდენობა დაიღუპა. რუსეთის თავდაცვამ ბრალდებები უარყო. პრიგოჟინმა საპასუხოდ განაცხადა, რომ გადაკვეთეს საზღვარი, "ვაგნერის" მებრძოლებმა როსტოვში და ვორონეჟში სამხედრო ობიექტები დაიკავეს. რუსეთის "ფსბ"-მ პრიგოჟინის წინააღმდეგ სისხლის სამართლის საქმე აღძრა.
ვლადიმერ პუტინმა დაჯგუფების მოქმედებებს ღალატი უწოდა და თქვა, რომ მასში მონაწილეები პასუხს აგებდნენ. პრიგოჟინი ამბობდა, რომ მისი მებრძოლები მოსკოვში შევიდოდნენ. ვითარების დასარეგულირებლად მოლაპარაკებები გაიმართა ბელარუსის პრეზიდენტის, ალექსანდრე ლუკაშენკოს მონაწილეობით. შედეგად, რუსეთის ხელისუფლებამ პირობა დადო, რომ შეაჩერებდა სისხლის სამართლის საქმეს ევგენი პრიგოჟინის წინააღმდეგ და არ დასჯიდა აჯანყების მონაწილეებს. პრიგოჟინმა უსაფრთხოების გარანტია მიიღო, შეთანხმების მიხედვით, ის ბელარუსში უნდა გამგზავრებულიყო. 
27 ივნისს ლუკაშენკომ თქვა, რომ პრიგოჟინი ბელარუსში ჩავიდა. ხოლო 6 ივლისს ლუკაშენკომ თქვა, რომ პრიგოჟინი რუსეთში, სანქტ-პეტერბურგში იმყოფებოდა.