დიდი ბრიტანეთი უკრაინაში შორი მოქმედების რაკეტების გასაგზავნად ემზადება. ინფორმაციას Washington Post ავრცელებს.
მედია უკრაინის საერთაშორისო ფონდის მიერ 2 მაისს გამოქვეყნებულ შესყიდვის შესახებ განცხადებას ეყრდნობა და წერს, რომ დოკუმენტში გაერთიანებული სამეფოს თავდაცვის სამინისტრომ ითხოვა "ინტერესის გამოხატვა" 300 კილომეტრ მანძილზე დარტყმის საშუალებების უზრუნველყოფაზე.
ოფიციალურმა პირმა მედიასთან განაცხადა, რომ საბოლოო გადაწყვეტილება ჯერჯერობით მიღებული არაა, თუმცა ბრიტანეთის მიერ ამგვარი საბრძოლო მასალის მიწოდებაზე განცხადება მნიშვნელოვანი ნაბიჯია.
მედია აღნიშნავს, რომ შესაძლოა საუბარია Storm Shadow-ის ტიპის საჰაერო ფრთოსან რაკეტებზე.
გავრცელებულია ინფორმაცია, რომ Storm Shadows შეიძლება დამონტაჟდეს საბჭოთა წარმოების უკრაინულ თვითმფრინავებზე. ასეთ რაკეტებს შეუძლიათ რუსეთის ტერიტორიაზე მიაღწიონ, თუმცა კიევი დასავლეთს ჰპირდება, რომ დონორ იარაღს რუსეთის წინააღმდეგ დარტყმისთვის არ გამოიყენებს.