ომის კვლევის ინსტიტუტის (ISW) თანახმად, რუსმა სამხედრო ბლოგერებმა აშშ-სა და NATO-ს საიდუმლო დოკუმენტების გაჟონვას სპეკულაციითა და შეშფოთებით უპასუხეს, რაც მათი მხრიდან უკრაინის მოსალოდნელი კონტრშეტევების შიშზე მიუთითებს.
საუბარია დოკუმენტზე, რომელიც დეტალურად ასახავს აშშ-სა და NATO-ს მიერ უკრაინის არმიის მომზადებას კონტრშეტევებისთვის. ინფორმაცია, რომ მსგავსმა მასალებმა სოციალურ ქსელებში გაჟონა NYT-მა გაავრცელა.
დოკუმენტებში საუბარი არ არის კონკრეტულ გეგმაზე: როგორ, როდის და სად აპირებს უკრაინა შეტევის დაწყებას, თუმცა ასახულია ის საჭიროებები, რომელიც უკრაინულ არმიას პირველი მარტის მდგომარეობით ჰქონდა. 

"გაჟონილი ინფორმაციის უტყუარობის მიუხედავად, რუსი სამხედრო ბლოგერების რეაქცია NYT-ის სიუჟეტზე, ხაზს უსვამს შიშს მოსალოდნელი უკრაინული კონტრშეტევების მიმართ.
რამდენიმე ცნობილმა რუსმა სამხედრო ბლოგერმა მაშინვე თქვა, რომ დოკუმენტები ნამდვილი არ არის. მათი თქმით, დოკუმენტები დეზინფორმაციაა, რომლის მიზანია რუსი სამხედრო სარდლობის დაბნევა და შეცდომაში შეყვანა", - ნათქვამია ISW-ის ანგარიშში.