უკრაინას შეუძლია რუსეთის ფედერაციასთან მოლაპარაკებების მაგიდასთან დაჯდეს დროებით ოკუპირებული ყირიმიდან რუსების დიპლომატიური გაყვანის საკითხზე სასაუბროდ - აცხადებს უკრაინის პრეზიდენტის ადმინისტრაციის უფროსის მრჩეველი, მიხაილო პოდოლიაკი. მისი თქმით, ეს სცენარი და უსაფრთხოების ორმხრივ გარანტიებზე საუბარი შესაძლებელი გახდება მხოლოდ მას შემდეგ, რაც უკრაინიდან რუსული ჯარები გავლენ.

„შეიძლება თუ არა საუბარი ყირიმიდან გაყვანის დიპლომატიურ გზაზე იმ მომენტში, როდესაც დაიწყება ჯარების გაყვანა უკრაინის ტერიტორიიდან? დიახ, თუ დღეს დაიწყება. ჩვენ ნამდვილად შეგვიძლია დაველოდოთ ერთი, ორი ან სამი დღე, სანამ ნივთებს შეაგროვებენ და ქერჩის ხიდის გავლით წავლენ, რომელიც დაიშლება“ ამბობს პოდოლიაკი.

მიხაილო პოდოლიაკი დარწმუნებულია, რომ უკრაინა-რუსეთის საზღვარზე 100 კილომეტრიანი დემილიტარიზებული ზონა უნდა შეიქმნას, სადაც რუსეთს არ ექნება უფლება შეინახოს იარაღის არსენალი ან ცოცხალი ძალა.
პოდოლიაკი ინტერვიუში ამბობს, რომ 2022 წელს ვერავინ იფიქრებდა, რომ 2023 წელს უკრაინა სერიოზულად ილაპარაკებდა ყირიმის დაბრუნებაზე და ბევრს ეგონა, რომ ეს 20-50 წლის ამბავი იყო, თუმცა ის ამბობს, რომ უკრაინა აუცილებლად იქნება ყირიმში - "ომის ლოგიკა აბსოლუტურად აშკარაა".