რუსეთის გენერალურმა პროკურატურამ ანტიკორუფციული არასამთავრობო ორგანიზაცია "საერთაშორისო გამჭვირვალობა" "არასასურველ" ორგანიზაციად გამოაცხადა და ოფიციალურად აკრძალა.
პროკურატურის ამ გადაწყვეტილებით კრიმინალიზებული გახდა ორგანიზაციის ყველა აქტივობა. დამნაშავედ მიიჩნევა ყველა, ვინც მათ ნებისმიერი სახის საქმიანობაში დაეხმარება.
უწყების განცხადებით, ორგანიზაცია "უხეშად იჭრება რუსეთის საშინაო საქმეებში და საფრთხეს წარმოადგენს ქვეყნის კონსტიტუციური საფუძვლებისთვის და სახელმწიფოს უსაფრთხოებისთვის. 
პროკურატურის მტკიცებით, "საერთაშორისო გამჭვირვალობის" აქტივობები შექმნილ ჩარჩოს გასცდა.
ორგანიზაცია რუსეთში "უცხოური გავლენის აგენტად" 2015 წელს გამოცხადდა.
შეგახსენებთ, რომ ანალოგიური კანონის მიღებას "ქართული ოცნება" საქართველოშიც ცდილობს. კანონპროექტის დამტკიცებას აქტიურად ეწინააღმდეგება ქვეყნის ოპოზიცია, სამოქალაქო საზოგადოება და არასამთავრობო სექტორი.
დღეს, 6 თებერვალს, მთელი დღის განმავლობაში საქართველოს პარლამენტში, იურიდიული კომიტეტის სხდომაზე რუსული კანონის განხილვა მიმდინარეობდა, რომელმაც მასობრივი საპროტესტო აქციის ფონზე ჩაიარა, თუმცა კომიტეტის წევრებმა კანონის მიღებას მხარი დაუჭირეს.