ის, რომ ფიზიკურად გაგვისწორდნენ, რამეს კი არ ნიშნავს, ხელს გამარტყამენ თუ წიხლს ჩამარტყამენ, ამით წიხლს ურტყამენ საკუთარი შვილების მომავალს, - ამის შესახებ „ნაციონალური მოძრაობის“ ერთ-ერთმა ლიდერმა, გიორგი ბოტკოველმა ჟურნალისტებს განუცხადა.
მისი თქმით, მისი და ოპოზიციის სხვა წარმომადგენლების მიმართ „ქართული ოცნების“ დეპუტატები ფიზიკურად იწევდნენ.
„ამათ ჰგონიათ, რომ დღეს ჩვენ იქ ვართ 10 ან 15 ოპოზიციონერი დეპუტატი და შეძლებენ ქვეყნის გარუსებას. არა, აქ იქნება ძალიან ბევრი ადამიანი. გადაიხედონ იქით, გადაიხედონ აქეთ, დარწმუნებული ვარ, ქართველი ხალხი არ მისცემს მათ იმის საშუალებას, რომ გაიტანონ ეს კანონი და გაარუსონ ბოლომდე ქვეყანა. ის, რომ ფიზიკურად გაგვისწორდნენ, რამეს კი არ ნიშნავს, ხელს დამარტყამენ თუ წიხლს ჩამარტყამენ, ამით წიხლს ურტყამენ საკუთარი შვილების მომავალს, მეტი არაფერი. ანრი ოხანაშვილის, პუტინის მონის დავალებით შემოცვივდნენ ერთად, როგორც მანდატურები, ისე გაურკვეველი ხალხი, ფიზიკურად გაგვისწორდნენ, „ქართული ოცნების“ დეპუტატები ჩვენზე ფიზიკურად იწევდნენ. მაგალითად, შოთა ხაბარელი, ამხელა დამსახურების კაცი, დღეს საქართველოს დამცველების წინააღმდეგ იწევს. ჩვენ რა უნდა დაგვაკლონ, ვერაფერი, მათ პასუხს გასცემთ ქართველი ხალხი “, - განაცხადა ბოტკოველმა.
ცნობისთვის, საქართველოს პარლამენტში, სადაც „უცხოური გავლენის გამჭვირვალობის“ შესახებ კანონპროექტი უნდა განეხილათ, ხმაური და დაპირისპირება ამ დრომდე გრძელდება. სხდომათა დარბაზიდან პარლამენტის უსაფრთხოების სამსახურმა ძალის გამოყენებით გაიყვანა ოპოზიციონერი დეპუტატები: დავით კირკიტაძე, დავით ხაჯიშვილი, ნიკოლოზ მაჭუტაძე, ლევან ხაბეიშვილი, გიორგი ბოტკოველი, გიორგი ვაშაძე და პაატა მანჯგალაძე.