"გაზაფხულზე უკრაინის არმია მზად იქნება კონტრშეტევისთვის"- ამის შესახებ უკრაინის თავდაცვის სამინისტროს დაზვერვის მთავარი სამმართველოს უფროსის მოადგილემ, ვადიმ სკიბიცკიმ ისაუბრა გერმანულ მედიაჯგუფ Funke-თან ინტერვიუში, რომელსაც DW ავრცელებს. 

„ვფიქრობ, გაზაფხულზე ჩვენ მზად ვიქნებით კონტრშეტევისთვის“, - განაცხადა მან და დასძინა, რომ ზუსტი მომენტი დამოკიდებულია მთელ რიგ ფაქტორებზე, მათ შორის დასავლური იარაღის მიწოდებაზე.

მთავარი სადაზვერვო სამმართველოს უფროსის მოადგილემ ასევე არ გამორიცხა, რომ უკრაინა დაარტყამს იარაღის საცავებს რუსეთში, კერძოდ, ბელგოროდის რეგიონში. "უკრაინაზე თავდასხმები იქიდან იწყება. ეს საფრთხეს უქმნის, მაგალითად, ხარკოვს", - განაცხადა მან.
მისი თქმით, გამოცხადებული კონტრშეტევის მიზანი იქნება „უკრაინის ყველა ოკუპირებული ტერიტორიის, მათ შორის ყირიმის გათავისუფლება“. „ჩვენ შევწყვეტთ მხოლოდ მაშინ, როცა ქვეყანას 1991 წლის საზღვრებში აღვადგინებთ“, - აღნიშნა სკიბიცკიმ.