„ქართული ოცნების“ თავმჯდომარე ირაკლი კობახიძის განცხადებით, საქართველოს მესამე პრეზიდენტმა მიხეილ სააკაშვილმა დაადასტურა, რომ „ჩვეულებრივი აგენტია“. ამით კობახიძე გამოეხმაურა ყოფილი პრეზიდენტის ინტერვიუს გერმანულ გამოცემა Spiegel-თან.
ირაკლი კობახიძის თქმით, მას იმასაც კი არ ეკითხებიან, რა მიზნით ჩაჰყავთ სხვა ქვეყანაში, "მოათავსეს კონტეინერში და გამოუშვეს".
მმართველი პარტიის თავმჯდომარე „სამწუხარო მოვლენად“ აფასებს იმას, რომ „ადამიანი, რომელიც აღიარებს, რომ აგენტია“ , ცხრა წელი მართავდა ქვეყანას.
კობახიძის თქმით, ასეთი პრეზიდენტები მომავალში აღარ უნდა ვიხილოთ.
„სააკაშვილმა დაადასტურა, რომ სინამდვილეში არის, მარტივად რომ ვთქვათ, ჩვეულებრივი აგენტი. მას იმასაც კი არ ეკითხებიან, თუ რა მიზნისთვის ჩაჰყავთ სხვა ქვეყანაში, ამ შემთხვევაში, საქართველოში. მოათავსეს კონტეინერში და გამოუშვეს საქართველოში. ასევე, რაც სამწუხარო მოვლენაა, ასეთი ადამიანი, რომელიც პრაქტიკულად აღიარებს, რომ არის აგენტი, ცხრა წელი ქვეყანას მართავდა და სწორედ ამის გამო მიიყვანა ქვეყანა იმ მდგომარეობამდე, რა მდგომარეობამდეც მიიყვანა. ასეთი პრეზიდენტები საქართველოში მომავალში აღარ უნდა ვიხილოთ. ზოგადად, ასეთი ადამიანები პოლიტიკის წინა „პლანზე“ საქართველოში აღარასდროს უნდა იყვნენ“, - განაცხადა კობახიძემ.
შეგახსენებთ, საქართველოს მესამე პრეზიდენტმა მიხეილ სააკაშვილმა Spiegel-თან ინტერვიუში განაცხადა, რომ საქართველოში დაბრუნება უნდოდა, მაგრამ დრო იყო ცუდი. მიხეილ სააკაშვილის თქმით, გამორიცხული არ არის, რომ ხალხი, რომელმაც 2021 წლის ოქტომბერში საქართველოში მისი დაბრუნება დაგეგმა, რუსეთის ჩანერგილი აგენტები იყვნენ.