ოპოზიციონერი ჩეჩენი ბლოგერი ტუმსო აბდურახმანოვი ცოცხალია, - ინფორმაციას ამის შესახებ გამოცემა „კავკაზ.რეალი” დევნილობაში მყოფი ჩეჩნეთის რესპუბლიკა იჩქერიის მთავრობის პრესსამსახურზე დაყრდნობით ავრცელებს.
„იმ ინფორმაციით, რომელსაც ვფლობთ, ტუმსო აბდურახმანოვი ცოცხალია და შვედეთის პოლიციის დაცვის ქვეშ იმყოფება“, - განაცხადა პრესსამსახურის წარმომადგენელმა.
მისი თქმით, მას „ინფორმაციის საკუთარი წყაროები” გააჩნია და ვერ დააკონკრეტა აბდურახმანოვი რა მიზეზებით შეიძლება იმყოფებოდეს დაცვის ქვეშ.
ინფორმაცია, თითქოს რამზან კადიროვის ცნობილი კრიტიკოსი შვედეთში მოკლეს, რამდენიმე დღის წინ რამდენიმე წყარომ გაავრცელა.
„კავკაზ.რეალის” რედაქციამ ოფიციალური მოთხოვნით შვედეთის პოლიციას მიმართა.
„ახლა ჩვენ არაფერი გვაქვს ჩვენი წინა კომენტარისთვის დასამატებელი”, - წერია უწყების პრესმდივნის ოფიციალურ პასუხში.
ცნობისთვის, აქამდე შვედეთის პოლიციას არ დაუდასტურებია და კომენტარი არ გაუკეთებია აბდურახმანვის შესაძლო მკვლელობის ცნობების შესახებ.