თეთრი სახლის ეროვნული უსაფრთხოების საბჭოს სპიკერის, ჯონ კირბის განცხადებით, რუსეთთან სამშვიდობო მოლაპარაკებების დაწყების შესახებ გადაწყვეტილება მხოლოდ უკრაინის პრეზიდენტ, ვოლოდიმირ ზელენსკის შეუძლია. როგორც კირბიმ აღნიშნა, აშშ-გან მოლაპარაკებების დაწყებაზე ზეწოლა არ ყოფილა და მათი პოზიცია თემასთან დაკავშირებით უცვლელია.

"ჩვენ ყველანი ვთანხმდებით, რომ დიპლომატიური გზა საუკეთესო გადაწყვეტაა ჯარების გაყვანისთვის. ჩვენ ასევე ვთქვით, რომ ზელენსკიმ უნდა განსაზღვროს არის თუ არა ან როდის იქნება მზად, ასევე როგორ გაიმართება ეს მოლაპარაკებები. შეერთებული შტატებიდან მას მოლაპარაკებებისკენ არავინ უბიძგებს", - თქვა ჯონ კირბიმ.

კირბიმ განცხადება მას შემდეგ გააკეთა, რაც ორი დღის წინ აშშ-ის გენერალმა, მარკ მილიმ თქვა, რომ რუსეთის წარუმატებლობის ფონზე, კიევს შეეძლო ესარგებლა და ომის დასრულებისთვის სამშვიდობო მოლაპარაკებები დაეწყო. 

"შეიძლება არსებობდეს პოლიტიკური გამოსავალი, იქ, სადაც რუსები პოლიტიკურად უკან დაიხევენ. შენ გინდა მოლაპარაკება, როცა უპირატესობა გაქვს, მოწინააღმდეგე კი დასუსტებულია და ეს შესაძლებელია - შესაძლოა, იყოს პოლიტიკური გადაწყვეტა", - თქვა მან.

თუმცა მედიასთან საუბრისას კირბიმ ხაზგასმით აღნიშნა, რომ აშშ არ არ აპირებს დისკუსიას რუსებთან უკრაინაში ომის დასრულებაზე, იმ შემთხვევაში, თუ უკრაინა არ იქნება ამ საუბრის ნაწილი.

"ეს საუბრები არ იქნება, რადგან პრეზიდენტმა ზელენსკიმ ნათლად თქვა, რომ ის ამისთვის მზად არ არის და თქვენ მას ვერ დაადანაშაულებთ", - აღნიშნა თეთრი სახლის ეროვნული უსაფრთხოების საბჭოს სპიკერმა.