"მოლაპარაკების ჩაშლა ოპოზიციის თვითმიზანი იყო" - წარუმატებელი მოლაპარაკების შემდეგ "ქართული ოცნების" თავმჯდომარე ირაკლი კობახიძე თავს ისევ ოპონენტებს ესხმის. ამბობს, რომ "ოპოზიციას კანონის უზენაესობის ფეხქვეშ გათელვა უნდოდა". 
პარლამენტის გადაყენებული თავმჯდომარე შეხვედრის დეტალებზე არ საუბრობს. აცხადებს, რომ მოლაპარაკებები გრძელდება, მანამდე კი ოპოზიციის წარმომადგენლებმა უპატივცემულობა გამოიჩინეს, ულტიმატუმები წამოაყენეს და შეთანხმება ჩაშალეს. 

იყო წინსვლაც ამ დღეების განმავლობაში, თუმცა სამწუხაროდ გამართლდა, ის რაზე ვლაპარაკობდით. როგორც ჩანს, ოპოზიციის თვითმიზანი იყო რომ შეთანხმებისთვის ვერ მიგვეღწია.. გუშინ იყო შედარებით მარტივი თემები და იქ ძირითად საკითხებზე შეჯერებული პოზიციები იყო, დღეს დამატებით 2 პუნქტი იყო განხილული და მივიღეთ ისეთი ულტიმატუმები რაც აჩვენებდა, რომ ოპოზიციის თვითმიზანი იყო მოლაპარაკებების ჩაშლა... ..ტრადიციულად, დესტრუქციული პარტიების წარმომადგენლები აქაც გამოირჩეოდნენ დესტრუქციული და ჩამშლელი მოქმედებებით, - ამბობს კობახიძე. 

კრისტიან დანიელსონი საქართველოში 12 მარტს ჩამოვიდა. მისი ვიზიტი 14 მარტს უნდა დასრულებულიყო, თუმცა, წარუმატებელი მოლაპარაკებების შემდეგ, ქვეყანაში ყოფნა გაახანგრძლივა და თქვა, რომ ქვეყანას არ დატოვებს, ვიდრე ოპოზიციასა და ხელისუფლებას შორის შეთანხმებას არ მიაღწევს. ვიზიტის ფარგლებში ის უკვე არაერთხელ შეხვდა როგორც ხელისუფლების, ისე ოპოზიციის წარმომადგენლებს. დანიელსონის საქართველოში გამოგზავნის გადაწყვეტილება შარლ მიშელმა 8 მარტს მიიღო.