"მთავარი არხის" გენერალური დირექტორი ნიკა გვარამია TV პირველს სოლიდარობას უცხადებს. როგორც მან გადაცემაში "დღის სტუმარი" თქვა, ეს მხოლოდ TV პირველზე და მედიაზე თავდასხმა არაა, ეს არის ქვეყანაზე თავდასხმა.
ნიკა გვარამია ამბობს, რომ პროკურატურის მიერ დღეს გავრცელებული დოკუმენტი სამართლებრივადაც და ლოგიკურადაც აბრუსდულია. სწორედ ამიტომ, "მთავარი არხის" გენერალური დირექტორი აცხადებს, დღეს, ბიძინა ივანიშვილმა გვითხრა, რომ მედიასაც შეაშინებს და თავის გარშემომყოფებსაც.

ქვეყანას მარტო ჯარით და იარაღით არ ესხმიან თავს. ასეთი ფორმის თავდასხმა ბევრად უფრო საშიში შეიძლება იყოს. ეს არის ქვეყნის დახურვა, რაც ჩვენ ახლა ვნახეთ პროკურატურის მხრიდან. "გამიმხილე წყარო", - ეს ლეგიტიმური კითხვაა, მაგრამ ლეგიტიმური უფლება გაქვს, რომ პასუხი გასცე, რომ "არ გაგიმხელ".. აბსურდული დოკუმენტია, არც სამართლებრივი და არც ლოგიკური შინაარსი არ აქვს. წყარო არის სრული პრივილეგიით დაცული, რა თქმა უნდა, და ამას არვინ არ მისცემდა, რისთვის უნდა შესულიყვნენ.. რომ ეუბნები, უნდა შემოვიდე და ამოვიღო ჩიპიო, სად დაგხვდება ეს ჩიპი, ხომ იცი, რომ შენობაში არ დაგხვდება.. ემოციებშია საქმე და ამ ემოციას შიში ჰქვია. ეს არის იმისთვის შექმნილი, რომ შეეშინდეთ ტვ პირველსაც და მედიასაც, - ამბობს ნიკა გვარამია. 

სასამართლომ პროკურატურას TV პირველიდან მასალების ამოღების უფლება მისცა. მოგვიანებით, უწყებამ  განმარტება გააკეთა და განაცხადა, რომ არავინ აპირებს ტელევიზიაში შეჭრას და შევარდნას.