დე ფაქტო ცხინვალის ე.წ. საგარეო საქმეთა სამინისტრო ზაზა გახელაძისთვის გამოტანილ ე.წ. განაჩენსა და უკანონო ტყვეობას ეხმიანება და განცხადებაში აღნიშნავს, რომ თბილისის მკაცრი განცხადებები ამ საკითხთან დაკავშირებით მიუღებელია, რადგან, მათი თქმით, ცხინვალი ადამიანებს არა ნაციონალური ნიშნით, არამედ "ჩადენილი დანაშაულის გამო" სჯიან. ამავე განცხადებაში აღნიშნულია, რომ ოფიციალური თბილისის პრეტენზიები აღიქმება, როგორც "სამხრეთ ოსეთის რესპუბლიკის შინაურ საქმეებში ჩარევა".

"აღსანიშნავია ის ფაქტი, რომ ცეცხლსასროლი იარაღით სამართალდამცველი ორგანოების წარმომადგენლებზე თავდასხმა, მათი სიცოცხლის ხელყოფის მცდელობა პირველად დაფისქირდა 2008 წლის ომის შემდეგ, რაც თავისთავად, საყოველთაო განხილვის საგანი უნდა გამხდარიყო", - აღნიშნულია თვითგამოცხადებული უწყების განცხადებაში. 

"იმის ნაცვლად, რომ დაეგმოთ შეიარაღებული თავდასხმა, ჩვენ თვალს ვადევნებთ ოფიციალური თბილისის მხრიდან სრულ ისტერიასა და ჭეშმარიტების მიჩქმალვის მცდელობას", - აღნიშნავს დე ფაქტო ცხინვალი. 

განცხადებაში, ასევე, აღნიშნულია, რომ რუსეთის მიმართ ოფიციალური თბილისის განცხადებები მისი დადანაშაულების მიზნით, "მორიგე ხასიათს" ატარებს.