ბრიტანეთში AstraZeneca-ს ვაქცინით მოსახლეობის აცრა დღეს დაიწყება - ამით ის მსოფლიოში პირველი ქვეყანა გახდება, რომელიც ოქსფორდის ვაქცინას მასობრივად გამოიყენებს. 
ამ მომენტში ინგლისში მდებარე 6 საავადმყოფოს ვაქცინის 530 000 დოზა უკვე მზად აქვს, ბრიტანელ მაღალჩინოსნებს კი იმედი აქვთ, რომ შემდეგი თვეების განმავლობაში ამ ვაქცინით მილიონამდე ადამიანი აიცრება.
"ეს გადამწყვეტი მომენტია" - ამბობს ბრიტანეთის ჯანდაცვის მინისტრი, მეთ ჰენკოკი. მისივე აზრით, AstraZeneca-ს ვაქცინა, რომელიც არსებულ პრეპარატებს შორის ყველაზე იაფია და არ საჭიროებს განსაკუთრებულ შენახვის პირობებს, "განუახლებს მოსახლეობას იმედს, რომ პანდემიის დასასრული ახლოვდება"
აქვე გეტყვით, რომ დიდ ბრიტანეთში უკვე მეხუთე დღეა, ვირუსი 24 საათში 50 ათასზე მეტ მოქალაქეს უდასტურდება. 2021 წლის პირველ დღეებში კი კორონავირუსის ახალი ვარიანტის გავრცელებასთან დაკავშირებით, ბრიტანეთში მარტში აშენებული სპეციალური კოვიდცენტრები კიდევ ერთხელ გახსნეს, ლონდონში მცხოვრები დაწყებითი კლასის მოსწავლეები კი სკოლიდან დაითხოვეს. 
ცნობისთვის, ოქსფორდის ვაქცინამდე ქვეყანამ Pfizer/BioNTech დაამტკიცა (მსოფლიოში პირველმა) და იმუნიზაცია 8 დეკემბერს დაიწყო.