ანა ნაცვლიშვილი - აქცენტის გადატანა, რომ ქვეყანაში ერთადერთი პრობლემა ოპოზიციის პარლამენტში არშესვლაა, აბსოლუტურად არასწორია
აქცენტის გადატანა თემაზე, რომ ქვეყანაში ერთადერთი პრობლემა ოპოზიციის პარლამენტში არშესვლაა, სხვა ყველაფერი დალაგებულია და ჩიტები ჭიკჭიკებენ, პეპლები მშვიდად ფრენენ, აბსოლუტურად არასწორია ,- ამის შესახებ "ლელო საქართველოსთვის” წევრმა ანა ნაცვლიშვილმა "ინტერპრესნიუსთან" განაცხადა.
მისივე თქმით, აუცილებელია, თვალი გავუსწოროთ, საძირკველში არსებულ პრობლემებს, რამაც ეს პოლიტიკური კრიზისი წარმოქმნა.
ნაცვლიშვილი ასევე გამოეხმაურა, პარლამენტის თავმჯდომარის არჩილ თალაკვაძის განცხადებას, რომლის მიხედვითაც, უახლოეს თვეებში, გარდატეხა მოხდება და ოპოზიცია საპარლამენტო პროცესში მონაწილეობას დაიწყებს. "ლელოს" წევრმა აღნიშნა, რომ ოპოზიციას ისევ ის პოზიცია აქვს, რაც აქამდე ჰქონდა, შესაბამისად, მათი ოპტიმიზმი რას შეიძლება ეყრდნობოდეს არ იცის.
"ჩვენი პოზიცია იგივეა, რაც აქამდე იყო. მიხარია, თუ მიხვდნენ, რომ ქვეყანას ახალი და სამართლიანად ჩატარებული არჩევნები სჭირდება. სხვა შემთხვევაში, არ ვიცი ეს ოპტიმიზმი რას შეიძლება ეყრდნობოდეს. ოპოზიციას ისევ ის პოზიცია აქვს, რაც აქამდე ჰქონდა. ძალიან არასწორია, შეცდომაში შემყვანია, ოპოზიციის პარლამენტში შესვლა, არ შესვლის მთავარ საკითხად დასახვა. ოპოზიციის პარლამენტში არ შესვლა და ბოიკოტი, ესაა - პრობლემის გამოხატულება და პრობლემის ძირია, როგორც იმართება სახელმწიფო წლების განმავლობაში. ეს პრობლემები, თუ არ აღმოიფხვრა, ოპოზიცია კიდეც რომ შევიდეს პარლამენტში, ამ ქვეყნის მოქალაქეები ისევ იმავე პრობლემებში იცხოვრებენ, ამიტომ ტყუილში არ უნდა ვიყოთ. სისტემის "გადატვირთვაა" საჭირო, ფუნდამენტური "გადატვირთვა"! ამ "გადატვირთვის" დასაწყისი შეიძლება გახდეს - სამართლიანი, სუფთად ჩატარებული არჩევნები. სხვა შემთვევაში, მოქალაქეებს ნუ მოვატყუებთ და ნუ ვეტყვით, რომ თუ ოპოზიცია პარლამენტში შევა, პრობლემები აღმოიფხვრება.
აქცენტის გადატანა იმ თემაზე, რომ ამ ქვეყანაში ერთადერთი პრობლემა ოპოზიციის პარლამენტში არშესვლაა, სხვა ყველაფერი დალაგებულია და ჩიტები ჭიკჭიკებენ, პეპლები მშვიდად ფრენენ, ასეთი დისკურსი აბსოლუტურად არასწორია და მიზნად მოქალაქეების არასწორ რეალობაში გადაყვანას ისახავს. აუცილებელია, თვალი გავუსწოროთ, საძირკველში არსებულ პრობლემებს, რამაც ეს პოლიტიკური კრიზისი წარმოქმნა", - განაცხადა ნაცვლიშვილმა.