როგორც ჩანს, ალეკო ელისაშვილს პარლამენტში შესვლა სურს, ამისთვის ეძებს საბაბს და მოგონილი საბაბით ოპოზიციასთან კონფლიქტში შესვლას ცდილობს,– ასე აფასებენ „ევროპულ საქართველოში“ მოქალაქეების ლიდერის ალეკო ელისაშვილის ბრალდებას „საბოტაჟის“ შესახებ.
როგორც საპასუხო ბრიფინგზე სერგი კაპანაძემ განაცხადა, „ევროპული საქართველო“ მონაწილეობს მოლაპარაკებებში, მიზანია ოპოზიციის მოთხოვნების (ახალი არჩევნები, პოლიტპატიმრები, საარჩევნო რეფორმა) „ბოლომდე გატანა“ და ამ შემთანხმების ერთგული რჩება.
„როგორც ჩანს, ბატონი ელისაშვილი საბაბს ეძებს და კოლეგა ოპოზიციურ პარტიაზე თავდასხმა ამ საბაბად გამოიყენა. მას თუ უნდა, რომ შევიდეს პარლამენტში, თქვას. ჩვენ ბოიკოტის რეჟიმში იმიტომ ვართ, რომ ეს არჩევნები გაყალბდა და ქართველ ხალხს წაართვეს ნება თავისუფალ არჩევნებზე. ამის გამო გვინდა, რომ ახალი არჩევნები ჩატარდეს. თუ მას მიაჩნია, რომ კოდექსში ახალი არჩევნების გაუმჯობესების შედეგად ის უნდა შევიდეს პარლამენტში, ამ არჩევნებს თავი დაანებოს, თქვას, რომ ის სამართლიანი იყო და ეს პარლამენტი ივანიშვილს „გაუპრაოს“, ლეგიტიმაცია მისცეს – გადაწყვიტოს და თქვას. რატომ შემოაქვს განხეთილება ოპოზიციის შიგნით? ყველა ოპოზიციური პარტია ჩამოყალიბებულები ვართ და ეს ეჭვებს მის ქვენა ზრახვებზე აჩენს – სხვა დასკვნის გაკეთება არ შემიძლია“,– განაცხადა კაპანაძემ.