14 ივლისის ღამეს რუსმა ოკუპანტებმა უკრაინის ქალაქ კრივოი-როგს დრონებით შეუტიეს. თავდასხმის შედეგად დაზიანდა საცხოვრებელი კორპუსები, კერძო სახლები, საგანმანათლებლო და სამედიცინო დაწესებულებები. ამის შესახებ ქალაქის თავდაცვის საბჭოს ხელმძღვანელი, ალექსანდრე ვილკული, Telegram-ზე წერს.
არსებული ინფორმაციით, რუსული თავდასხმის შედეგად დაზიანდა:

• 127 საცხოვრებელი კორპუსი,
• 22 კერძო სახლი,
• 24 საგანმანათლებლო დაწესებულება,
• 7 სამედიცინო დაწესებულება.

"სამწუხაროდ, ხანძარი გაჩნდა კრივოი-როგში. კომუნალურ კომპანიაში, ერთსართულიან ადმინისტრაციულ შენობაში. ხანძარი სწრაფად ლოკალიზდა. დაშავდა 56 წლის კაცი, მას გაეწია საჭირო სამედიცინო დახმარება," - თქვა ვილკულმა.

როგორც გამოცემა "უნიანი" წერს, გასულ ღამეს უკრაინის ძალებმა დნეპროპეტროვსკის რეგიონში ჯამში მტრის ექვსი დრონი ჩამოაგდეს.