"ქართული ოცნების" თავმჯდომარის, ირაკლი კობახიძის მტკიცებით, "მთავარი არხის" დამფუძნებელი ნიკა გვარამია ციხიდან "გამოუშვეს პოლარიზაციისთვის". 
როგორც ის ამბობს, გვარამიამ 29 ივნისს მიცემული ინტერვიუთი დაადასტურა, რომ მისი ციხიდან გამოშვების ერთადერთი მიზეზი პოლარიზაცია იყო. 

"გვარამია გამოუშვეს პოლარიზაციისთვის. რეალურად ვინც უკარნახა სალომე ზურაბიშვილს რომ უნდა შეეწყალებინა გვარამია, მას ამოძრავებდა ერთადერთი მიზანი ეს იყო პოლარიზაცია. ჩვენ ვიცით, რომ გვარამია ჩვენს პოლიტიკურ სისტემაში იყო ერთ-ერთი პოლარიზატორი, ვინც აღვივებდა პოლარიზაციას მთელი ამ წლების განმავლობაში. შესაბამისად, რა თქმა უნდა, გვარამიას შეწყალების უკან ერთადერთი მიზანი იყო პოლარიზაციის გაღვივება, რაც დაადასტურა გვარამიამ თავისი გუშინდელი ინტერვიუთი. ის აღვივებს პოლარიზაციის გაღვივებას, რაც იყო მისი გათავისუფლების მიზანი," - ამბობს ირაკლი კობახიძე და ამტკიცებს, რომ "ციტატა ნახა" და ინტერვიუსთვის არ უყურებია.

კობახიძე ნიკა გვარამიას "პრიგოჟინისტს" უწოდებს და ამბობს, რომ ქართულ პოლიტიკაში "მისი რესურსი არის ნულოვანი".