სასპეკულაციო არაფერია, ჩვენ გვჭირდება მუდმივი კოორდინაცია საერთაშორისო პარტნიორებთან იმისთვის, რომ არ მოხდეს ქვეყნის ტერიტორიის გამოყენება სანქციების გვერდით ავლისთვის - გახსოვთ, ათასი სპეკულაცია და ტყუილი, რომელსაც ავრცელებდნენ შიდა რადიკალური ოპოზიციის წარმომადგენლები, უკრაინის ხელისუფლების წარმომადგენლები, სხვა ადამიანები, თუმცა, ყოველ ჯერზე ფაქტებით დამტკიცდა, რომ ეს ყველაფერი ცარიელი ტყუილი იყო,- ამის შესახებ „ქართული ოცნების“ თავმჯდომარემ, ირაკლი კობახიძემ ჟურნალისტებთან განაცხადა.
როგორც კობახიძემ აღნიშნა, სახელმწიფო უწყებები ყველაფერს აკეთებენ, რომ ქვეყნის ტერიტორია არ იყოს გამოყენებული სანქციების გვერდით ავლისთვის.
„ჩვენი ოპონენტები ყველაფერზე სპეკულირებას ცდილობენ. სინამდვილეში ჩვენმა სახელმწიფო სტრუქტურებმა აღკვეთეს სანქციებზე გვერდის ავლის ათეულობით მცდელობა, ეს ცნობილია ჩვენი პარტნიორებისთვის და მუშაობა გრძელდება. ყველა ეტაპზეა საჭირო კოორდინაცია საერთაშორისო პარტნიორებთან, ზუსტად ამ კოორდინაციის გაძლიერებას ემსახურება ის ვიზიტი, რომელიც განხორციელდა. რა თქმა უნდა, ამას გამოიყენებს სპეკულაციისთვის ჩვენი ოპონენტები, სინამდვილეში აქ სასპეკულაციო არაფერია, ჩვენ გვჭირდება, მუდმივი კოორდინაცია საერთაშორისო პარტნიორებთან იმისთვის, რომ არ მოხდეს ქვეყნის ტერიტორიის გამოყენება სანქციების გვერდით ავლისთვის.
რისკები ყოველთვის არსებობს, სწორედ ამისთვის არიან მობილიზებულები სახელმწიფო უწყებები. როდესაც რისკები არსებობს, საჭიროა კოორდინაცია, ეს არის ასეთი შეხვედრების მიზეზი. გახსოვთ, ათასი სპეკულაცია და ტყუილი, რომელსაც ავრცელებდნენ ჩვენი შიდა რადიკალური ოპოზიციის წარმომადგენლები, უკრაინის ხელისუფლების წარმომადგენლები, სხვა ადამიანები, თუმცა, ყოველ ჯერზე ფაქტებით დამტკიცდა, რომ ეს ყველაფერი ცარიელი ტყუილი იყო. სახელმწიფო უწყებები ყველაფერს აკეთებენ, რომ ქვეყნის ტერიტორია არ იყოს გამოყენებული სანქციების გვერდით ავლისთვის, მომავლისთვისაც საჭიროა სიფხიზლე“, - აღნიშნა კობახიძემ.
კითხვაზე, როგორ შეაფასებს არასამთავრობოების განცხადებას, რომ პარტნიორების ვიზიტი სიგნალია, რომ შემდეგი ნაბიჯი სანქცია იქნება, კობახიძე განმარტავს, რომ „პრიგოჟინისტული“ მიდგომებია, როდესაც შენ გინდა, რომ მაქსიმალურად შეექმნას ქვეყანას პრობლემა, რასაც ჩვენი ოპოზიციის წარმომადგენლები ვერ მალავენ“.
„ჩვენ არ ვაწესებთ სანქციებს რუსეთის ფედერაციის წინააღმდეგ, მაგრამ არავის ვაძლევთ ამ ტერიტორიის გამოყენების საშუალებას სანქციების გვერდით ავლისთვის“,- აღნიშნა კობახიძემ.