"ფორმულას" ერთ-ერთ დამფუძნებელზე, მიშა მშვილდაძეზე თავდასხმის ფაქტზე შინაგან საქმეთა სამინისტრომ გამოძიება დაიწყო. ტელეწამყვანს სამედიცინო დახმარება ხეჩინაშვილის სახელობის კლინიკაში აღმოუჩინეს, რის შემდეგაც სპეციალურ საგამოძიებო სამსახურში გამოკითხვაზე გადაიყვანეს. მიშა მშვილდაძეს წუხელვე ჩაუტარდა ექსპერტიზაც.
შემთხვევა "კარფურში" მოხდა. მშვილდაძე ყვება, რომ მას თავს უკნიდან დაესხნენ, დარტყმის შემდეგ ის კიბეზე წაიქცა და ვეღარ ხედავდა ორი პირი ურტყამდა თუ ერთი.

"თავდასხმა განხორციელდა გამიზნულად, ჩემი აზრით და ჩასაფრებით. უკნიდან დამესხნენ თავს, ორნი იყვნენ, მაგრამ რამდენი მირტყამდა, ერთი თუ ორივე, ვერ ვიტყვი, იმიტომ, რომ პირველივე დარტყმისას წავიქეცი კიბეზე და მერე უკნიდან ვგრძნობდი დარტყმებს და ხელი ავიფარე. ორიენტირებული იყო, რომ მაინც და მაინც მოერტყა სახეში, რომ მაქსიმალურად კვალი დაეტოვებინა. ეს ხომ პროპაგანდისტული ამბავია, ეს ხომ იმისთვის არ არის, რომ მომკლან. თითქოს ძალადობა არის ერთადერთი ღირებულება, რაზეც შეიძლება იდგეს პოლიტიკაში რამე და საზოგადოებრივ ცხოვრებაში, ასე ჰგონიათ, ძალის დემონსტრირებაა", - თქვა მიშა მშვილდაძემ. 

"ფორმულას" გენერალური დირექტორის მოადგილე, გიორგი თარგამაძე ამბობს, რომ მანამდე მსგავსი საქციელის გამო ადამიანები არ დასჯილან ისე, როგორც უნდა დასჯილიყვნენ. მისი თქმით, თუ ასეთ ფაქტებს საზოგადოების შესაბამისი პროტესტი არ მოჰყვა, არ აქვთ იმედი, რომ ხელისუფლება სათანადო ნაბიჯებს გადადგამს.