„ნიკა გვარამიას თავისუფლების მოძრაობის” წევრებმა პრეზიდენტის ადმინისტრაციაში „მთავარი არხის” დირექტორის ნიკა გვარამიას შეწყალებასთან დაკავშირებით ოფიციალური განაცხადი შეიტანეს. დოკუმენტებს თან ერთვის ორი ინსტანციის, თბილისის საქალაქო სასამართლოს და სააპელაციო სასამართლოს გადაწყვეტილებები.
„ნიკა გვარამიას თავისუფლების მოძრაობის“ წევრები ამბობენ, რომ პრეზიდენტმა სალომე ზურაბიშვილმა გადაწყვეტილება ქვეყნის ინტერესების შესაბამისად უნდა მიიღოს.
„ვთხოვთ პრეზიდენტს შეიწყალოს ნიკა გვარამია. შევიტანეთ განაცხადი პრეზიდენტის ადმინისტრაციაში და დოკუმენტს თან დავურთეთ საქმის მასალები, ორივე ინსტანციის განაჩენი. მოგეხსენებათ, ჩვენ ვაპელირებთ ნიკა გვარამიას უდანაშაულობაზე, ვამბობთ, რომ ის არის პოლიტიკური პატიმარი. იზიარებს თუ არა ამას პრეზიდნეტი, მოვუწოდებთ, რომ იხელმძღვანელოს ქვეყნის ინტერესით, პოლიტიკური მიზანშეწონილობით. მიუხედავად თავისი პრიადი შეხედულებისა, მიიღოს სწორი გადაწყვეტილება და გაათავისუფლოს ნიკა გვარამია”, – განაცხადა „ნიკა გვარამიას თავისუფლების მოძრაობის“ წევრმა გიორგი ლომიძემ.
მისი თქმით, პრეზიდენტის საჯარო განცხადებებიდან გამომდინარე ჰქონდათ მოლოდინი, რომ ნიკა გვარამია ამ დროისთვის უკვე თავისუფალი იქნებოდა, თუმცა შედეგი ჯერ არ აქვთ, რის გამოც მოქმედებას აგრძელებენ.
„ნიკა გვარამიას თავისუფლების მოძრაობის“ წევრებმა პრეზიდენტ სალომე ზურაბიშვილს „მთავარი არხის“ დირექტორის შეწყალებისკენ რამდენჯერმე აქციებიდანაც მოუწოდეს, მათ შორის აქცია გამართეს პრეზიდენტის ადმინისტრაციასთანაც.