საქართველოს აეროპორტების გაერთიანების ცნობით, კომპანია Wizz Air-მა საბორტო ჟურნალში დროებით ოკუპირებული აფხაზეთის ცალკე სახელმწიფოდ ხსენების გამო, ბოდიში მოიხადა და უხეში შეცდომა ონლაინ ვერსიაშიც გამოასწორა.
განცხადების თანახმაად: 

"გვსურს გამოვეხმაუროთ სოციალურ ქსელში გავრცელებულ ინფორმაციას, სადაც ავიაკომპანია WIzz Air-ის საბორტო ჟურნალში აფხაზეთი ცალკე სახელმწიფოდ არის ნახსენები. საქართველოს აეროპორტების გაერთიანების, საგარეო საქმეთა სამინისტროს და უნგრეთში საქართველოს საელჩოს უშუალო ჩართულობით, ავიაკომპანიამ აღნიშნული უხეში შეცდომა ონლაინ ვერსიაში უკვე გამოასწორა. მიმდინაროებს მუშაობა ბეჭდურ ვერსიაში ჩასწორებასთან დაკავშირებით. ასევე, ავიაკომპანიამ მედიის საშუალებით ბოდიშიც მოიხადა. 
,,გვინდა ბოდიში მოვიხადოთ საბორტო ჟურნალში გაპარული სამწუხარო შეცდომის გამო და გითხრათ, რომ ჟურნალის ონლაინ ვერსიაში შეცდომა უკვე გასწორებულია, ხოლო ბეჭდური ვერსია მთლიანად ჩანაცვლდება ტექსტისა და რუკის შესწორებული ვარიანტით რაც შედარებით მეტ დროს მოითხოვს. 
ხაზგასმით გვინდა აღვნიშნოთ, რომ ავიაკომპანია Wizz Air-ს არ აქვს შეხება ჟურნალის შინაარსობრივ ნაწილთან, მასზე მუშაობს დამოუკიდებელი სარედაქციო და საგამომცემლო ჯგუფი, თუმცა, ეს რა თქმა უნდა, არ გვათავისუფლებს პასუხისმგებლობისგან. 
კიდევ ერთხელ გამოვთქვამთ ღრმა მწუხარებას მომხდარის გამო და აღვნიშნავთ, რომ მუდამ ვრჩებით საქართველოს ტერიტორიული მთლიანობის მხარდამჭერებად,-"ნათქვამია ავიაკომპანიის მიერ გავრცელებულ განცხადებაში. 
ჩვენთვის, როგორც ქუთაისის საერთაშორისო აეროპორტის ოპერატორი კომპანიისთვის და ავიაკომპანია Wizz Air-ის სტრატეგიული პარტნიორისთვის უმნიშვნელოვანესია ჩვენმა ევროპელმა პარტნიორებმა პატივი სცენ ჩვენი ქვეყნის სუვერენიტეტსა და ტერიტორიულ მთლიანობას",-ნათქვამია განცხადებაში.