იუსტიციის მინისტრი ისევ ამტკიცებს, რომ ევროკავშირის ელჩთან შეხვედრისას მიხეილ სააკაშვილის გადაყვანაზე საუბარი არ ყოფილა და  რომ კრიტიკული მედია ამ საკითხზე დეზინფორმაციას ავრცელებს.

"თქვენც იწერთ, მეც ვთხოვე ჩემს მეგობრებს, რომ ჩაიწერონ. ეს ყველაფერი უნდა გაუშვათ ოღონდ და კომენტარს გავაკეთებ მხოლოდ მას შემდეგ, რაც თქვენ თვითონ, თქვენი არხი იტყვის, რომ თქვენ მიერ გავრცელებული ინფორმაცია, თქვენივე ვებგვერდზე გავრცელებული ინფორმაცია არ შეესაბამება სიმართლეს, ეს არის დეზინფორმაცია, ან შემოგევრცელათ.
რაც ელჩმა თქვა, მაგას ნამდვილად გიდასტურებთ, რომ გვქონდა ამ საკითხზე ძალიან გულახდილი და საკმაოდ ვრცელი საუბარი და მივაწოდეთ ინფორმაცია იმის შესახებ თუ რას აკეთებს სახელმწიფო მსჯავრდებულ სააკაშვილის უფლებრივი მდგომარეობის უზრუნველსაყოფად და ასევე როგორ ზრუნავს სახელმწიფო მსჯავრდებულ სააკაშვილის ჯანმრთელობაზე. 
გისურვებთ წარმატებულ დღეს და დეზინფორმაციისგან დაცლილ დღეს." უთხრა ბრეგაძემ "მთავარს"

შეგახსენებთ, გუშინ,  27 თებერვალს საქართველოში ევროკავშირის წარმომადგენელმა, პაველ ჰერჩინსკიმ და შვედეთის ელჩმა, ულრიკ თიდერსტრომმა საქართველოს იუსტიციის მინისტრს ოფიციალური საპროტესტო ნოტა გადასცეს. განცხადებას ხელს ევროკავშირის 27 ქვეყანა აწერს.
ნოტაში მესამე პრეზიდენტის უფლებების დაცვის მოთხოვნაა გაწერილი
ევროპული ქვეყნები ერთხმად აცხადებენ, რომ მიხეილ სააკაშვილი უნდა გადარჩეს და მისი ჯანმრთელობის მდგომარეობის დამძიმება დაუშვებელია.