ამ წუთებში რამდენიმე ქვეყანაში საქართველოს საელჩოსთან მიხეილ სააკაშვილის საზღვარგარეთ გადაყვანის მოთხოვნით აქცია იმართება.
ბულგარეთის დედაქალაქ სოფიაში, საელჩოსთან საქართველოს, ბულგარეთისა და უკრაინის მოქალაქეები შეიკრიბნენ. 

"სოფიაში ბულგარელები, უკრაინელები და ქართველები ვმართავთ აქციას, რათა მოვუწოდოთ ევროკავშირს, ასევე ბულგარეთისა და საქართველოს მთავრობებს, რომ დაეხმარონ მიხეილ სააკაშვილს, მიიღოს სამედიცინო დახმარება საზღვარგარეთ. რაც მის თავს ხდება ახლა, ეს არის კაცობრიობის სირცხვილი", - ამბობს აქციის მონაწილე.

აქცია იმართება უკრაინის დედაქალაქ კიევშიც. აქციის მონაწილეების თქმით, მიხეილ სააკაშვილს ციხეში კლავენ, რაც ეწინააღმდეგება ადამიანურ პრინციპებს.

"ჩვენ, უკრაინელები, ახლა ვიბრძვით ჩვენი თავისუფლებისთვის, მიხეილ სააკაშვილს კი, რომელიც ბრძენი და ძლიერი ადამიანია, ციხეში კლავენ. ეს ეწინააღმდეგება ყველა სახის ადამიანურ პრინციპს. ამიტომ, ჩვენ გამოვედით აქციაზე, რათა მოვითხოვოთ, რომ ადამიანს მისცენ სიცოცხლის უფლება. ჩვენ წინააღმდეგი ვართ, რომ ადამიანებს კლავდნენ, განსაკუთრებით კი ციხეში", - თქვა აქციის ერთ-ერთმა მონაწილემ.

პარალელურად აქცია მიმდინარეობს მოლდოვის დედაქალაქ კიშინიოვსა და გერმანიის დედაქალაქ ბერლინში.
გლობალური აქცია რუსი უფლებადამცველის მარკ ფეიგინის ინიციატივით იმართება. მისი ინფორმაციით, აქცია მიხეილ სააკაშვილის მხარდასაჭერად 40-მდე ქალაქში გაიმართება.
მიხეილ სააკაშვილის საზღვარგარეთ სამკურნალოდ გადაყვანის მოთხოვნით მოქალაქეები საქართველოში, რამდენიმე ქალაქში შეიკრიბებიან. აქცია დაგეგმილია: თბილისში, ქუთაისში, ბათუმში,  რუსთავში, გორში, ზუგდიდში, ჭორვილასა და ურეკში.