"ერთიანი ნაციონალური მოძრაობის" განცხადებით, მუშაობენ ბიზნესმენების ვასილ ჩიგოგიძის, ალექსანდრე დალაქიშვილის, ანტონ ობოლაშვილისა და ისკო დასენის სანქცირებაზე. ამ თემაზე განცხადება ლევან ხაბეიშვილმა გააკეთა და მოუწოდა მათ, ამხილონ "ივანიშვილის რეჟიმი" და დატოვონ უმრავლესობა. 

"მე მინდა მოკლე განცხადება გავაკეთო და მოვუწოდო "ქართული ოცნების" უმრავლესობის წევრებს, ბიზნესმენებს, რომლებიც არიან პარლამენტში, ახლა მე დავასახელებ ოთხ მათგანს, თუმცა ეს არ არის ცხადია ვიწრო წრე, რომელი მიმართულებითაც ჩვენ ვმუშაობთ, საუბარია ბიზნესმენ ვასილ ჩიგოგიძეზე, ალექსანდრე დალაქიშვილზე, ანტონ ობოლაშვილზე და ისკო დასენზე, ჩემო ძვირფასებო, ჩვენ ვაგროვებთ მტკიცებულებებს თქვენ რუსულ კავშირებთან დაკავშირებით, ასევე, სხვებთან დაკავშირებით, თუმცა დღეს მხოლოდ ამ ოთხით შემოვიფარგლებით, თქვენ გაქვთ რამდენიმე კვირა ჯერ კიდევ ამხილოთ ბიძინა ივანიშვილის რეჟიმი რუსეთის ომის დაფინანსებაში ფაქტობრივად, დატოვოთ უმრავლესობა და უზრუნველყოთ "ქართული ოცნების" უმრავლესობის დაშლა პარლამენტში", - თქვა ლევან ხაბეიშვილმა. 

მისი განცხადებით, ეს გამოიწვევს ახალ არჩევნებს და ხელისუფლების ცვლილებას. ხაბეიშვილი ამბობს, რომ უკრაინის ანტიკორუფციული სამსახურის სიაში არიან ვანო ჩხარტიშვილი, რუხაძე, ხიდაშელი და ფარცხალაძე.  
პარტიის კიდევ ერთი წევრი, ხატია დეკანოიძე ამბობს, რომ უკრაინის მიერ სანქცირებულთა სია გაფართოვდება და ბიძინა ივანიშვილმა, ისევე როგორც "ოცნებამ" კარგად იცის, რატომ არ არის ჯერ ამ ჩამონათვალში.
"ბიძინა ივანიშვილის კაპიტალს აუცილებლად დაემუქრება საფრთხე სანქციების სახით, იმ შემთხვევაში, თუ ის არ ჩამოსცილდება მმართველობას" - ამბობს დეკანოიძე.