თეთრი სახლის პრესსპიკერის,  კარინ ჟან-პიერის განცხადებით, ირანი ცრუობს, როცა უარყოფს ინფორმაციას იმის შესახებ, რომ მან რუსეთს "კამიკაძე" დრონები მიაწოდა.
ამის შესახებ ჟან-პიერმა თეთრ სახლში გამართულ ბრიფინგზე ისაუბრა.

"ჩვენ საჯაროდ განვაცხადეთ, რომ რუსეთმა ირანიდან დრონები მიიღო, რომ ეს იყო რუსეთის გეგმის ნაწილი მიეღო სხვადასხვა ტიპის ასობით ირანული უპილოტო საფრენი აპარატი და რომ რუსი ოპერატორები ირანში ამ სისტემის გამოყენებას სწავლობენ. არსებობს მათი გამოყენების მტკიცებულებები როგორც სამხედრო, ასევე, სამოქალაქო ობიექტების წინააღმდეგ. 
ყველამ ნახეთ ცნობები იმის შესახებ, რომ ირანულმა დრონებმა კიევს დაარტყა, ამის მიუხედავად ირანი აგრძელებს ტყუილს. ისინი არ ამბობენ სიმართლეს ამის შესახებ და უარყოფენ რუსეთისთვის იარაღის მიწოდებას უკრაინაში გამოსაყენებლად.
ამავდროულად, ირანი განიხილავს კიდევ უფრო მეტი იარაღის გაყიდვას იმ შეჭრის მხარდასაჭერად, რომელსაც როგორც თავად ამტკიცებენ, ეწინააღმდეგებიან. ჩვენ გავაგრძელებთ სანქციების დაწესებას როგორც რუსეთის, ასევე, ირანული იარაღით ვაჭრობის სფეროებზე", - თქვა მან.