უკრაინის გენერალური შტაბი ადასტურებს, რომ რუსმა სამხედროებმა ნაწილობრივ წარმატებას მიაღწიეს ლუგანსკის ოლქის ქალაქ სევეროდონეცკში.
მისი ცნობით, მოწინააღმდეგემ არტილერიის მხარდაჭერით განხორციელებული იერიშების შედეგად უკრაინის შეიარაღებული ძალების ქვედანაყოფებს ქალაქის ცენტრიდან უკან დაახევინა, თუმცა საბრძოლო მოქმედებები გრძელდება.
რაც შეეხება ბახმუტის მიმართულებას, გენშტაბი იუწყება, რომ უკრაინელმა ჯარისკაცებმა წარმატებით მოიგერიეს მტრის თავდასხმა.
უკრაინის პრეზიდენტმა ვოლოდიმირ ზელენსკიმ წუხელ ვიდეომიმართვისას განაცხადა, რომ უკრაინელი სამხედროები სევეროდონეცკის თითოეული მეტრისთვის იბრძვიან და ქალაქის ქუჩებში სასტიკი ბრძოლა მიმდინარეობს. მისი თქმით, რუსმა სამხედროებმა დაანგრიეს სევეროდონეცკიდან მეზობელი ლისიჩანსკისკენ მიმავალი ხიდი, რამაც კიდევ უფრო გაართულა მშვიდობიანი მოქალაქეების ევაკუაცია.
სევეროდონეცკისთვის ბრძოლა რამდენიმე კვირაა გრძელდება.