ისრაელიდან იორდანიაში ჩასული აშშ-ის სახელმწიფო მდივანი ენტონი ბლინკენი ამანში იორდანიის საგარეო საქმეთა მინისტრს აიმან საფადის და ეგვიპტის საგარეო საქმეთა მინისტრს სამეჰ შუკრის შეხვდა.
მოლაპარაკებების შემდეგ მათ ერთობლივი პრესკონფერენცია გამართეს, სადაც ბლინკენმა აღნიშნა, რომ ისრაელზე ჰამასის თავდასხმის შემდეგ, 7 ოქტომბრამდე არსებული მდგომარეობა ვეღარ დაბრუნდება. მისივე თქმით, შეერთებული შტატები ისრაელთან ერთად პალესტინის სახელმწიფოს შექმნის იდეის ერთგული რჩება, მაგრამ -  „ჩვენ ყველას გვესმის, რომ სტატუს კვოს ვერ დავუბრუნდებით“.
ბლინკენმა ხაზგასმით აღნიშნა, რომ შეერთებული შტატები აღიარებს ისრაელის უფლებას ჰამასის წინააღმდეგ თავდაცვაზე, მაგრამ „მან უნდა მიიღოს ყველა შესაძლო ზომა მშვიდობიანი მოსახლეობის მსხვერპლის თავიდან ასაცილებლად“.
აშშ-ის სახელმწიფო მდივანმა აღნიშნა, რომ ისრაელის ხელმძღვანელობასთან განიხილა სამხედრო ოპერაციებში „ჰუმანიტარული პაუზების“ შესაძლებლობა მშვიდობიანი მოსახლეობის დასახმარებლად, თუმცა, ბლინკენი კვლავ ეწინააღმდეგებოდა ეგვიპტისა და იორდანიის მოწოდებებს ცეცხლის სრული შეწყვეტის შესახებ.

ცეცხლის შეწყვეტა ახლა ჰამასს უბრალოდ დროს მისცემს, რომ გადაჯგუფდეს და გაიმეოროს ის, რაც გააკეთეს 7 ოქტომბერს. სულ რამდენიმე დღის წინ ჰამასის მაღალჩინოსანმა განაცხადა, რომ აპირებენ 7 ოქტომბრის მოვლენების თავიდან გამეორებას. ვერც ერთი ქვეყანა ვერ დათანხმდება ამას - ამბობს ბლინკენი. 

იორდანიის საგარეო საქმეთა მინისტრმა, აიმან საფადიმ კი პრესკონფერენციაზე აღნიშნა, რომ „მთელი რეგიონი იძირება სიძულვილის ზღვაში და ეს გადამწყვეტი იქნება მრავალი მომავალი თაობისთვის“.
"ეს არ არის რელიგიური ომი. ეს არ არის ომი მუსლიმებსა და ებრაელებს შორის" - თქვა  აიმან საფადიმ.
ეგვიპტის საგარეო საქმეთა მინისტრმა, სამეჰ შუკრიმ განაცხადა, რომ ბლინკენთან მოლაპარაკებების დროს "ორმაგი სტანდარტების გამოყენების" წინააღმდეგ გამოვიდა -"არაბული სისხლი სხვა ხალხების სისხლზე ნაკლები არ უნდა იყოს" - თქვა მან და ღაზაში, ცეცხლის დაუყოვნებლივი და უპირობო შეწყვეტა მოითხოვა.
აშშ-ის სახელმწიფო მდივანი, ენტონი ბლინკენი იორდანიიდან თურქეთში გაემგზავრება.