პენტაგონში ადასტურებენ, რომ ღაზის სექტორში "ჰამასის" მიერ გატაცებული მძევლების მოსაძებნად დრონს იყენებენ. როგორც პენტაგონის წარმომადგენელმა, გენერალმა პატ რაიდერმა განაცხადა, ფრენები 7 ოქტომბრის თავდასხმის შემდეგ დაიწყო.

"მძევლების გამოყვანის მცდელობების მხარდასაჭერად, აშშ ღაზის თავზე უიარაღო უპილოტო საფრენი აპარატების ფრენებს ახორციელებს. ასევე, აწვდის რჩევებსა და დახმარებას ჩვენს ისრაელელ პარტნიორებს, როდესაც ისინი მძევლების გამოყვანის მცდელობებზე მუშაობენ," - თქვა რაიდერმა.

მანამდე სხვადასხვა გამოცემა წყაროებზე დაყრდნობით წერდა, რომ ღაზის სექტორის თავზე ამერიკული სადაზვერვო დრონები დაფრინავენ. საუბარი იყო MQ-9 Reapers-ის ტიპის უპილოტო საფრენ აპარატებზე.

შეგახსენებთ, რომ 7 ოქტომბერს, ღაზის სექტორიდან ისრაელზე მოულოდნელი სარაკეტო და სახმელეთო თავდასხმა წამოიწყეს. თავდასხმაზე პასუხისმგებლობა ტერორისტულმა დაჯგუფება "ჰამასმა" აიღო და მას ოპერაცია "ალ-აკსას შტორმი" უწოდა. სარაკეტო იერიშის საპასუხოდ ისრაელის თავდაცვის სამინისტრომ საომარი მდგომარეობა და ოპერაცია "რკინის ხმლების" დაწყება გამოაცხადა. 
"ჰამასმა" მძევლად აიყვანა როგორც ისრაელის, ასევე სხვა ქვეყნის მოქალაქეები. გავრცელებული ინფორმაციით, ღაზის სექტორში ამ დროისთვის დაახლოებით 240-მდე მძევალი იმყოფება.
ასევე ნახეთ:

• BBC : ამერიკული უპილოტო თვითმფრინავები ღაზის თავზე მძევლებს ეძებენ