ვენეციის კომისია თვლის, რომ საქართველოს ხელისუფლების მხრიდან მის მიერ გაცემული მნიშვნელოვანი წინა რეკომენდაციები 2023 წლის ივნისში მიღებული ან/და 2023 წლის სექტემბერში შეთავაზებული რეფორმების კანონპროექტებით კვლავ არ არის გათვალისწინებული.
ამის შესახებ ვენეციის კომისიის დასკვნაში წერია, რომელიც ცოტა ხნის წინ გამოქვეყნდა. 18-გვერდიან დოკუმენტში წერია, რომ ვენეციის კომისია მთავრობას მოუწოდებს, სასამართლო რეფორმა გაუმრთლებელი დაყოვნების გარეშე დაიწყოს.
დოკუმენტში ნათქვამია, რომ მთავარი გადაუჭრელი საკითხი იუსტიციის უმაღლესი საბჭოს სრულყოფილი რეფორმაა, რომელიც მის ფუნქციებს და უფლებამოსილებებს, ასევე გადაწყვეტილების მიღების წესსა და მისი წევრების არჩევის მიდგომას გადახედავს. 
კომისია ასევე აღნიშნავს, რომ კანონში მცირე ან ტექნიკური ცვლილებები ამ რეკომენდაციების შესრულებას არ ნიშნავს. მათივე შეფასებით, რეფორმის პროცესი უნდა იყოს დეტალური, ინკლუზიური და ის ყველა დაინტერესებული პირის ჩართულობით უნდა წარიმართოს.