ხაბაროვსკის მანქანათმშენებელი ქარხნის, Дальэнергомаш-ის მენეჯერის, ალექსანდრე მიკუშოვის განცხადებით, ტვირთს საქართველოში და ყაზახეთში მანქანით აგზავნიან, ხოლო ინდოეთში ზღვის გავლით მიაქვთ შეკვეთა.
მისივე განცხადებით, ქარხანამ წელს საქართველოში მსხვილი სავაჭრო კონტრაქტი გააფორმა. 

"ჩვენ წელს მსხვილი სავაჭრო კონტრაქტი გავაფორმეთ -  საქართველოს მივაწვდით ქიმიური სასუქების წარმოებისთვის საჭირო ტექნიკას,  ჩვენთან აკეთებენ შეკვეთას, იმიტომ რომ ყველა ეს მეტალურგიული კომბინატი აშენებულია ერთი პროექტით ჯერ კიდევ საბჭოთა დროს. ამიტომ, ამ ხაზზე საჭირხნი დანადგარების შეცვლა ძალიან რთულია. ჩვენი დანადგარები კი 50 წელია მუშაობენ.  საბჭოთა კავშირის დროს იქ ქიმიური კომბინატი აშენდა, სადაც მინერალურ სასუქებს უშვებდნენ. ამიტომ, კავშირები დარჩა და ჩვენ მუშაობას ვაგრძელებთ. როდესაც საქმე ეხება მსხვილ შეკვეთას , მაგალითად ქიმიურ კომპონენტებს ახლოს მდებარე ქვეყნებში გაგზავნას, საქართველოში და ყაზახეთში მანქანით ვაგზავნით, ინდოეთში კი ზღვით გადაგვაქვს შეკვეთა", - ამბობს ალექსანდრე მიკუშოვი. 

დღეს რუსულმა სამთავრობო გამოცემა Tass-მა გაავრცელა ინფორმაცია, რომ 30-წლიანი პაუზის შემდეგ რუსული Дальэнергомаш-ი საქართველოსთვის ტექნიკის მიწოდებას აახლებს. ხაბაროვსკის საინჟინრო ქარხანა ტექნიკას რუსთავის "აზოტის" ქარხანას მიაწვდის. ქარხანაში ჯერჯერობით კომენტარს არ აკეთებენ.