საბერძნეთში ძლიერი სიცხისგან გამოწვეულ ტყის ხანძრებს ებრძვიან - კუნძული როდოსის შემდეგ ევაკუაცია გამოცხადდა კიდევ ორ კუნძულზე.
კორფუ ჩრდილო-აღმოსავლეთით მდებარე კუნძულია, რომელიც ტურისტებისთვის პოპულარული დასასვენებელი ადგილია. ევაკუაცია გამოცხადდა კუნძულზე მდებარე ექვს რაიონში. მოსახლეობის ზღვით ევაკუაციისთვის ადგილზე ნავები გაგზავნეს.
ევაკუაციის ბრძანება გაიცა ასევე კუნძულ ევიას ნაწილებზე, რომელიც მდებარეობს ცენტრალური საბერძნეთის აღმოსავლეთ სანაპიროზე. ოთხი სოფლის მაცხოვრებლებს ევაკუაციისა და კარისტოსის რაიონში გადაადგილებისკენ მოუწოდეს.
მანამდე ევაკუაცია გამოცხადებული იყო როდოსზე. ოფიციალური ინფორმაციით, კუნძულიდან 19 000 ადამიანი გაიყვანეს.
დაშავებულების შესახებ ინფორმაცია არ ვრცელდება.
უკვე რამდენიმე კვირაა საბერძნეთში რეკორდულად მაღალი სიცხე ფიქსირდება. ტემპერატურა 40 გრადუსს აჭარბებს. ძლიერი სიცხეებისა და ხანძრის გამო ქვეყანაში ეროვნული დღესასწაული გაუქმდა.