გერმანიას, მისი ისტორიული პასუხისმგებლობის გამო, მსოფლიოში ჩადენილი ყველაზე მძიმე დანაშაულებისთვის, აქვს ვალდებულება, თავიდან აიცილოს მომავალი ომები და დანაშაულები, - ამის შესახებ გერმანიის საგარეო საქმეთა მინისტრმა ანალენა ბერბოკმა განაცხადა.
„ჩვენი პასუხისმგებლობა იყო და არის საერთაშორისო სამართლის განმტკიცება მომავალი ომების თავიდან ასაცილებლად, გენოციდის, კაცობრიობის წინააღმდეგ ჩადენილი დანაშაულების თავიდან ასაცილებლად“, - აღნიშნა ბერბოკმა.
მისი თქმით, რუსეთის პრეზიდენტის ვლადიმერ პუტინის გადაწყვეტილებამ, არ გაახანგრძლივოს შავი ზღვის მარცვლეულის შეთანხმება, „შოკში ჩააგდო“ ყველა ქვეყანა და გაეროს ყველა დელეგატი. მან ხაზი გაუსვა პუტინზე ზეწოლის მნიშვნელობას ამ გადაწყვეტილების შესაცვლელად და აღნიშნა, რომ ამ კუთხით საუკეთესო გზაა, აფრიკის, ლათინური ამერიკისა და აზიის ქვეყნებმა პირდაპირ მიმართონ პუტინს.
„ბოლო ერთი წლის განმავლობაში ჩვენ ვნახეთ, რომ შედეგი აქვს, თუ პუტინს არა მხოლოდ ევროპის ქვეყნები, არამედ მსოფლიოს სხვა ქვეყნებიც მიმართავენ“, - აღნიშნა ბერბოკმა.