დედოფლისწყაროში პრემიერმინისტრის მამის საცხოვრებელი სახლის ღობის დაზიანებისათვის დაკავებული პირი ხონის ფსიქიატრიულ საავადმყოფოში გადაიყვანეს.
33 წლის გიორგი გოჩიტაშვილი დაწესებულებაში იძულებითი წესით მკურნალობის კურსს ორწელიწად- ნახევარი გაივლის. მისი ადვოკატის ინფორმაციით, გადაწყვეტილება 19 ივნისს, ფსიქიატრიული ექსპერტიზის დასკვნის შედეგად მიიღეს.
ამ მიზეზით, დაკავებულის მიმართ სამართლებრივი დევნა შეწყდა და ის სასამართლო სხდომასაც აღარ დასწრებია.
გოჩიტაშვილმა ტარიელ ღარიბაშვილის ჭიშკარს სატვირთო მანქანა 23 აპრილს დააჯახა და ადგილიდან მიიმალა. ის სამართალდამცავებმა ლილოს მიმდებარე ტერიტორიაზე დააკავეს. მას შემდეგ, რაც გზად რამდენიმე ავტომობილი, მათ შორის შსს-ს კუთვნილი მანქანები დააზიანა. სამართალდამცავებს კი ფიზიკურად გაუსწორდა.
გიორგი გოჩიტაშვილს პროკურატურა სხვისი ნივთის დაზიანებას ან განადგურებას და საზოგადოებრივი წესრიგის დამცველის ან ხელისუფლების სხვა წარმომადგენლის მიმართ წინააღმდეგობას, მუქარასა და ძალადობას ედავებოდა.
კაცი სასამართლო სხდომაზე აცხადებდა, რომ მისი ქცევა იყო სწორი, "თქვენ უნდა ემსახურებოდეთ ხალხს და არა კლანს და ღარიბაშვილებს", - თქვა მან, როდესაც მოსამართლემ წინასწარი პატიმრობა შეუფარდა.
გოჩიტაშვილი ტარიელ ღარიბაშვილთან მუშად იყო დასაქმებული. გავრცელებული ინფორმაციით, მან ტარიელ ღარიბაშვილს სახლის მშენებლობისათვის საჭირო მასალა სთხოვა, რაზეც უარი მიიღო. ამის შემდეგ კი, მეგობრის კუთვნილი კამაზი პრემიერის მამის სახლის ღობეს დააჯახა. გოჩიტაშვილის ოჯახის წევრები აცხადებდნენ, რომ კაცს ფსიქოლოგიური პრობლემები არ ჰქონია.