შეერთებული შტატების პრეზიდენტის, ჯო ბაიდენის თქმით, უკრაინისთვის კასეტური საბრძოლო მასალის გადაცემის შესახებ გადაწყვეტილების მიღება "რთული იყო", თუმცა როგორც ბაიდენი აღნიშნავს, კიევს ეს იარაღი სჭირდება.
ამის შესახებ ბაიდენმა CNN-თან ინტერვიუში ისაუბრა და გადაწყვეტილების მიღების მიზეზები განმარტა.

"ჩემი მხრიდან ეს ძალიან რთული გადაწყვეტილება იყო. სხვათა შორის, მე ეს საკითხი განვიხილე ჩვენს მოკავშირეებთან, ჩვენს მეგობრებთან. ეს არის ომი, რომელიც დაკავშირებულია საბრძოლო მასალასთან და მათ ეწურებათ ეს საბრძოლო მასალა, ჩვენ კი ცოტა გვაქვს, ამიტომ რაც საბოლოოდ გავაკეთე, მივიღე თავდაცვის უწყების რეკომენდაცია, რომ - არა მუდმივად, მაგრამ ამ გარდამავალ პერიოდში დავუშვა ჭურვები უკრაინელებისთვის", - თქვა ბაიდენმა.

შეგახსენებთ, 7 ივლისს შეერთებულმა შტატებმა უკრაინისთვის სამხედრო დახმარების ახალი პაკეტი გამოაცხადა, რომელიც კასეტურ საბრძოლო მასალას მოიცავს.
უკრაინამ აშშ-ს რამდენიმე თვის წინ სთხოვა კასეტური საბრძოლო მასალის გადაცემა. ვაშინგტონი დიდი ხნის განმავლობაში განიხილავდა ამ საკითხს.
კასეტური საბრძოლო მასალა 100-ზე მეტი ქვეყნის მიერაა აკრძალული, თუმცა მასში არ შედიან აშშ, რუსეთი და უკრაინა.