საფრანგეთში აქციები გრძელდება - ღამის განმავლობაში პოლიციამ 719 მოქალაქე დააკავა, მომიტინგეებსა და პოლიციას შორის ყველაზე დიდი შეტაკებები ქვეყნის სამხრეთით ქალაქ მარსელში მოხდა.
აქციები საფრანგეთში უკვე მე-5 დღეა გრძელდება. პროტესტი პოლიციის მხრიდან 17 წლის მოზარდის მკვლელობამ გამოიწვია. გასულ დღეებში სამართალდამცველებმა ათასობით მომიტინგე დააკავეს. ქვეყნის შინაგან საქმეთა სამინისტროს თქმით, პირველი ივლისის ღამე შედარებით "მშვიდი იყო".
გასული ღამე ყველაზე მძიმე იყო მარსელში - სოციალურ ქსელებში გავრცელებულ ვიდეოებში ჩანს, რომ პოლიციამ მომიტინგეების წინააღმდეგ ცრემლმდენი გაზი გამოიყენა.
ვიდეოში ასევე ნაჩვენებია შეტაკებები, რომლებიც მარსელის შუაგულში, მთავარ გამზირზე მიმდინარეობს. შეტაკებები მოხდა ასევე ქალაქ ნიცასა და სტრასბურგში.
საფრანგეთში არეულობის გამო შაბათს ქვეყნის მასშტაბით 45 000 პოლიციელი იყო განლაგებული.
17 წლის მოზარდი 27 ივნისს პარიზის გარეუბანში მოკლეს. ახალგაზრდა, რომელიც წარმომავლობით ალჟირი-მოროკოდან იყო, ორმა პოლიციელმა საგზაო წესების დარღვევისთვის გააჩერა.
სოციალურ ქსელში გავრცელდა ვიდეო, რომელიც, სავარაუდოდ, ბიჭის მკვლელობის მომენტს ასახავს. გავრცელებულ ვიდეოში ჩანს, რომ პოლიციელი მანქანის მძღოლს იარაღს უმიზნებს, რა დროსაც მანქანა მოძრაობას იწყებს, პოლიციელი კი მანქანის შიგნით ისვრის. 
პოლიციელი, რომელმაც ბიჭს ესროლა დაკავებულია, მის წინააღმდეგ გამოძიება ნებაყოფლობით მკვლელობის მუხლით მიმდინარეობს.