იმ მომენტში, როდესაც ევროკავშირში საქართველოსთან დაკავშირებით მნიშვნელოვანი გადაწყვეტილება უნდა მიიღონ, სავიზო რეჟიმის გაუქმების გადაწყვეტილება საქართველოსთვის არის სასჯელი, - ამის შესახებ „სტრატეგიული ანალიზის ცენტრის" დამფუძნებელმა გიორგი რუხაძემ „პალიტრანიუსის“ გადაცემაში „რეზიუმე“ განაცხადა.
რუხაძის თქმით, საქართველომ რუსეთიდან არ უნდა მიიღოს რეისები, რადგან საქართველო ევროკავშირის სივრცეში მოიაზრებს თავს.
მისივე შეფასებით, საქართველოს ხელისუფლებაში არავინ არის, ვინც იტყვის, რომ საქართველოს არ სჭირდება რუსეთთან უვიზო რეჟიმის ამოქმედება.
„რუსეთის საქართველოსთან სავიზო რეჟიმის გაუქმება საჩუქარი არ არის, პირიქით, იმ მომენტში, როდესაც ევროკავშირში საქართველოსთან დაკავშირებით მნიშვნელოვანი გადაწყვეტილება უნდა მიიღონ, ეს გადაწყვეტილება საქართველოსთვის არის სასჯელი. კითხვა უნდა დავსვათ ასე - რატომ ახლა? თუ კარგი იყო აქამდე რატომ ველოდით?! ევროკავშირის, არცერთი სახელმწიფოდან არაფერი დაფრინავს და რუსეთიდან არაფერს იღებს.
ამ გადამწყვეტ მომენტში რუსეთმა დაგაყენა არა ცივილიზებული სამყაროს მხარეს, არამედ თავისი გავლენის სფეროში. საქართველოს ხელისუფლებაში არავინ არის, ვინც დღეს იტყვის, რომ ეს არის რუსეთის გადაწყვეტილება, ჩვენ არ გვსიამოვნებს და არც გვჭირდება. საქართველომ რუსეთიდან არ უნდა მიიღოს რეისები, იქიდან გამომდინარე რომ საქართველო ევროკავშირის სივრცეში მოიაზრებს თავს.
საქართველო დიდ დარტყმას მიიღებს, რადგან ამით საქართველო დგება რუსეთის მოკავშირეების რიგში და არა უკრაინის და დასავლეთის მხარეს. თან ევროკავშირის წევრი იყო და თან რუსეთთან ფრენები აღადგინო, ეს არ გამოვა“,- განაცხადა რუხაძემ.
კითხვაზე, იმოქმედებს თუ არა რუსეთთან ფრენების აღდგენა კანდიდატის სტატუსის მიღებაზე, რუხაძე პასუხობს, რომ უვიზო რეჟიმის აღდგენა კანდიდატის სტატუსის მიღებაზე ვერ იმოქმედებს.
კითხვაზე, რა მიზანი შეიძლება ჰქონდეს რუსეთის ფედერაციის მიერ უვიზო რეჟიმის დაწესებას და ფრენების აღდგენას, რუხაძე პასუხობს, რომ რუსეთის პრეზიდენტის, ვლადიმერ პუტინის სურვილია ახალი მიზეზები გაჩნდეს იმისათვის, რომ საქართველომ კანდიდატის სტატუსი არ მიიღოს.
„მიმაჩნია, რომ ეს ნაბიჯი არის საქართველოსთვის სივრცის შემცირება დასავლეთის მიმართულებით. ახლა გადამწყვეტი მომენტია, საქართველომ შეიძლება მიიღოს კანდიდატის სტატუსი, მიუხედავად იმისა თუ როგორ იქცევა საქართველოს ხელისუფლება. ეს საფრთხედ მიაჩნია ვლადიმერ პუტინს და მას უნდა რომ ახალი მიზეზები გაჩნდეს, რის გამოც საქართველოს სტატუსი არ მისცენ. საქართველოს ხელისუფლებასაც უნდა ასეთი მიზეზების გაჩენა“,- განაცხადა რუხაძემ.