Facebook-მა საქართველოში საქართველოს მთავრობის სტრატკომთან დაკავშირებული 26 გვერდი, 9 ჯგუფი და 80 ანგარიში წაშალა. სულ საუბარია 117 არაავთენტური ანგარიშების ქსელზე.
Facebook-ის განცხადებით, ეს გვერდები და ჯგუფები ადგილობრივ და დამოუკიდებელ პრო-სამთავრობო ჯგუფებს წარმოადგენდნენ. განცხადებაში ნათქვამია, რომ ქსელის მთავარი მიზანი იყო გაეძლიერებინა კონტენტი საქართველოს ამჟამინდელი ხელისუფლების მხარდასაჭერად, მათ შორის ოფიციალური სამთავრობო გვერდებისა და პრო-სამთავრობო მედიის ანგარიშების ხელახალი გაზიარების ჩათვლით. ისინი ასევე ავრცელებდნენ კრიტიკას ოპოზიციის მიმართ, Facebook-ის განცხადებით, კრიტიკა განსაკუთრებით გაძლიერებული იყო რუსული კანონის წინააღმდეგ ბოლო საჯარო საპროტესტო გამოსვლების დროს.
 
Facebook-მა შიდა გამოძიების შედეგად რეგიონში აღმოაჩინა "საეჭვო კოორდინირებული არაავთენტური ქცევა".
კომპანია განცხადებაში აღნიშნავს, რომ საპროტესტო აქციების დროს ანგარიშების მიღმა მყოფი პირები პოსტავდნენ ე.წ. მიმებს, ტექსტურ სტატიებსა და კომენტარებს. Facebook-ის თქმით, მიუხედავად იმისა, რომ ოპერაციის მიღმა მყოფი პირები ცდილობდნენ თავიანთი ვინაობისა და კოორდინაციის დამალვას, გამოძიებამ აღმოაჩინა კავშირი საქართველოს მთავრობის ადმინისტრაციის სტრატეგიული კომუნიკაციების დეპარტამენტთან.
კომპანია აღნიშნავს, რომ Facebook-სა და Instagram-ზე რეკლამისთვის დაახლოებით 33 500 აშშ დოლარი დაიხარჯა.