სუს-ის ბრძანება ე.წ. ქოლ - ცენტრების მფლობელებს - როგორც "მთავარ არხს" უსაფრთხოების სამსახურთან დაახლოებული წყარო ანონიმურად აწვდის ინფორმაციას, სუს-მა ყველა ქოლ- ცენტრს გაფრთხილება მისცა, რომ ორი კვირის ვადაში საქმიანობა უნდა შეაჩერონ და თაღლითური ტრანზაქციების კვალი წაშალონ. 
იმავე წყაროს ინფორმაციით, გადაწყვეტილება ბოლო დროს განვითარებულ მოვლენებს უკავშირდება. კერძოდ კი საერთაშორისო მედია ბოლო დროს აქტიურად სვამს კითხვას, როგორ გადაიქცა საქართველო მსგავსი ტიპის ტრანსნაციონალური  დანაშაულის ჰაბად და ვინ უწყობს ამ ყველაფერს ხელს. 
"მთავარ არხს" კი სხვადასხვა დროს არაერთი წყარო უდასტურებდა, რომ სქემების მფარველობა უშუალოდ სუს-იდან და სხვადასხვა მაღალჩინოსნების მხრიდან ხდებოდა. 
წყაროს ინფორმაციით, ე.წ. სასწრაფო ევაკუაციის გეგმა გრიგოლ ლილუაშვილმა აამოქმედა. გადაწყვეტილების მთავარი მოტივი კი BBC-ის ჟურნალისტური გამოძიება გახდა.
"მთავარის" ინფორმაციით, მოთხოვნაა ყველა მცირე თუ მსხვილი ქოლ-ცენტრის დახურვა საქართველოში, რადგან თაღლითობის მასშტაბი უკვე მსოფლიოში ვეღარ იმალება და აქტიურად ისმის კითხვები - როგორ იქცა საქართველო საერთაშორისო თაღლითობის ჰაბად.
გადაწყვეტილების თანახმად, ფუნქციონირებას გააგრძელებს მხოლოდ ის ქოლ-ცენტრები, რომლებსაც ხელისუფლების მაქსიმალური ნდობა და დიდი მფარველობა აქვს. დანარჩენები კი უნდა დაიხუროს, ან შეიცვალოს დისლოკაციის ადგილი.