აშშ-ის სახელმწიფო დეპარტამენტის მხრიდან, 4 მოსამართლის დასანქცირებასთან დაკავშირებით, იუსტიციის უმაღლესი საბჭოს სხდომაზე საგანგებო განცხადება გააკეთა საბჭოსა და უზენაესი სასამართლოს თავმჯდომარემ, ნინო ქადაგიძემ.
ქადაგიძე ამბობს, რომ დეპარტამენტის მხრიდან გაჟღერდა უმძიმესი ბრალდებები, რაზეც ის შესაბამის მტკიცებულებებს ითხოვს:

"საკმაოდ მძიმე ნოტაზე ვხსნით დღევანდელი საბჭოს სხდომას. აშშ-ის სახელმწიფო მდივნის მიერ, ჩემი კოლეგების მიმართ გაჟღერდა უმძიმესი ბრალდებები. მე მაქსიმალურად მინდა ვიყო მშვიდი და კორექტული, აქედან გამომდინარე, ძალიან დიდ იმედს ვიტოვებ, რომ წარმოდგენილი იქნება ან შესაბამისი მტკიცებულებები, ან საკითხი გადაიხედება დეპარტამენტის მხრიდან.
ეს განცხადებები სასამართლოში იწვევს ძალიან დიდ დაძაბულობას და მე როგორც უზენაესი სასამართლოს თავმჯდომარემ და საბჭოს თავმჯდომარემ, მინდა ჩემს კოლეგებს მაქსიმალურად მოვუწოდო სიმშვიდისკენ, ასევე ვთხოვო საზოგადოებას, რომ ნუ გამოიტანენ ჯერჯერობით ნაადრევ დასკვნებს. მე დიდ იმედს ვიტოვებ, რომ ძალიან ბევრი რამე გაირკვევა და იმ კითხვებზე, რომელზეც პასუხი არ არის გაცემული, გაეცემა პასუხები და მე ამ პასუხებს მიიღებ.
ჩემი ოფიციალური განცხადება გაკეთდება მხოლოდ მას შემდეგ, რაც მომეცემა საშუალება, რომ მთელ რიგ საკითხებში გავერკვიო" განაცხადა ქადაგიძემ.