ჩვენი დეფეტიზმი უნისონშია მხოლოდ და მხოლოდ რუსეთის ნარატივთან, ეხმიანება მხოლოდ რუსეთის პროპაგანდას. ამის არც ახსნა, არც გაგება შემიძლია და არც გაზიარება - აცხადებს საქართველოს პრეზიდენტი და მმართველი პარტიის წარმომადგენლების  განცხადებებს ეხმაურება. ზურაბიშვილი სავარაუდოდ იმ განცხადებებს გულისხმობს, რომელიც ბოლო 2 დღეა "ოცნების" ახალ ნარატივს წარმოადგენს. საუბარია იმაზე, რომ ომში რუსეთს აქვს უპირატესობა: 

"ოკუპირებული ტერიტორიების მქონე ხელისუფლების მიერ აქამდე გამოხატული გარკვეული სიფრთხილე ყველას ესმის და ყველასთვის გასაგებია, თუმცა სიფრთხილე არასდროს გამორიცხავდა, მით უმეტეს ჩვენთვის და ჩვენს ქვეყანაში, არც ღირსებას და არც სოლიდარობას. 
სულ სხვაა დღევანდელი მდგომარეობა. ახალი გზავნილები, რაც ორი დღეა მმართველი პარტიისგან ისმის, წინააღმდეგობაში მოდის ჩვენი ყველა პარტნიორი ქვეყნის სახელმწიფო ლიდერის განცხადებებთან. ჩვენი დეფეტიზმი უნისონშია მხოლოდ და მხოლოდ რუსეთის ნარატივთან, ეხმიანება მხოლოდ რუსეთის პროპაგანდას. ამის არც ახსნა, არც გაგება შემიძლია და არც გაზიარება." ნათქვამია სალომე ზურაბიშვილის განცხადებაში, რომელსაც მისი ადმინისტრაცია ავრცელებს.